Kukullat e njohur Barbie kanë nxjerrë koleksionin e ri për Lojërat Olimpike, “Tokyo 2020”, por ka marrë kritika të shumta. Kompania e lodrave që prodhon kukullat Barbie, bashkëpunoi me Komitetin Olimpik Ndërkombëtar (IOC) dhe organizatorët e “Tokyo 2020” për të publikuar një linjë të re kukullash të krijuara posaçërisht për Lojërat Olimpike.
Koleksioni përfshin pesë kukulla që pasqyrojnë pesë sportet e reja që u shtuan në programin olimpik këtë vit, ku përfshihet bejsboll/softball, ngjitje sportive, karate, skateboarding dhe sërf.
“Tokyo 2020 është një ngjarje monumentale që bashkon botën përmes sportit dhe frymëzon tifozët e të gjitha moshave. Koleksioni Tokio 2020 nderon këto sporte dhe frymëzon një brez të ri përmes shpirtit olimpik dhe traditës së shquar atletike”, u shpreh në një deklaratë kompania e produhimit të kukullave.
Por pavarësisht gjithë përpjekjeve për të nxjerrë në pah diversitetin dhe gjithëpërfshirjen, shumë njerëz kanë kritikuar mungesën e një kukulle Barbie aziatike.
Të shumtë janë përdoruesit që pyesin sesi Mattel mund të harrojë të përfshijë një Barbie aziatike për Lojërat Olimpike që u mbajtën në Tokio.
“Mattel i bën #aziatikët të padukshëm teksa shpall ‘linjën më të larmishme të kukullave’, duke theksuar një vend aziatik, duke shfaqur #Barbie me uniformë të karatesë japoneze dhe duke e cilësuar secilën kukull si ‘zyrtare të Tokyo 2020′” shkroi artistja vizuale japonezo-amerikane Drue Kataoka në Twitter.
