Për ndjekësit e një kishe në jug të Limës së Perusë, Kolë Berishaj me origjinë malazeze njihet si një pastor, por për policinë kombëtare ai është një drejtues i fuqishëm i një organizate të rrjetit ndërkombëtar të trafikut të drogës.
Policia e Drejtorisë kundër Drogës (Dirandro) arriti të shkatërronte organizatën e tij vetëm pasi kapi të gjithë personat e tij të besuar.
Domingo al Día zbuloi se kryetrafikanti shqiptar nga Mali i Zi i njohur si “Baba” përdorte fenë për të mbuluar punët e tij të pista.
“Unë flas nga fjala e Perëndisë. Nëse të dhemb… sipas Biblës, problemi yt nuk është tek unë, është tek Zoti. Nëse flas jashtë Biblës, jam nga një planet tjetër. Të ndjekim Zotin, mos t’i harrojmë kurrë mëkatet tona,”- thotë në një nga fjalimet e tij Berishaj, përballë një grupi besimtarësh.
Autoritetet dyshojnë se pastori i rremë ungjillor vepronte në Peru që nga viti 2006, ndaj vlerësohet që të ketë trafikuar sasi të mëdha kokaine me vlerë disa milion dollarë.
Në një operacion i kryer pak ditë më parë, oficerët e policisë Dirandro sekuestruan më shumë se 100 pako kokainë të pastërtisë së lartë, me vlerë 10 milion dollarë.
Autoritetet kishin identifikuar plotësisht drogën që i përkiste “Babës” dhe miqve të tij, pasi kishte vulën e markës së makinave luksoze Roll Royce.
Kolë Berishaj është një nga njerëzit më të kërkuar nga policia e antidrogës. Ai u pa një ditë para kapjes së të gjithë klanit të tij dhe më pas u zhduk. Sipas të dhënave të tij të emigracionit, ai u largua nga Peruja për në Francë.
