Nuk janë aspak të pazakonta rastet kur kompanitë ajrore mund të vonojnë fluturimet dhe si pasojë dëmton pasagjerët.
Në të tilla raste pasagjerët mbrohen me politika të veçanta kompensimi, që kanë filluar të zbatohen edhe në Shqipëri, por priten të ndryshojnë sipas Kodit të ri Ajror.
Sipas gazetës “Panorama” në mbledhjen e fundit qeveria miratoi Kodin e ri, që në kapitullin e tretë “Përgjegjësia kontraktuese” neni 143 analizon vonesat në transport.
Sipas përcaktimeve të reja, transportuesi (linja ajrore) është përgjegjëse për dëmtimet e shkaktuara nga vonesat në transportimin ajror të pasagjerëve. Ky nen përmban edhe një përjashtim kur “Transportuesi nuk është përgjegjës për dëmet shkaktuar nga vonesa, kur provon se punonjësit dhe agjentët e tij morën të gjitha masat e mundshme për të shmangur dëmtimin ose kur provon se marrja e masave të tilla ishte e pamundur”.
Në rast dëmi, të shkaktuar nga vonesa në transportimin e një personi, përgjegjësia e transportuesit për çdo pasagjer llogaritet më shumë se 5000 euro.
Kompensimi për bagazhet
Kodi i ri ajror trajton edhe nenin e veçantë për kompensimin e bagazheve të humbura ose të shkatërruara. Shuma për këtë kompensim mund të arrijë deri në 1200 euro dhe detajet përcaktohen në 7 pika të nenit 144.
1.Transportuesi është përgjegjës për dëmet e shkaktuara në rast shkatërrimi, humbje ose dëmtimi të bagazheve të dorëzuara, kur këto veprime ndodhin në bordin e avionit apo gjatë periudhës në të cilën bagazhi i dorëzuar transportuesit. Transportuesi nuk është përgjegjës nëse dëmtimi ndodh për shkak të bagazhit.
2.Transportuesi është përgjegjës për dëmin e shkaktuar në rast vonese të bagazhit të dorëzuar,përveçse kur vërteton se agjentët dhe punonjësit e tij morën të gjitha masat e mundshme për të shmangur dëmtimin ose kur marrja e masave të tilla ishte e pamundur.
3.Në rast humbje, shkatërrimi ose dëmtimi të bagazhit të dorës , përfshirë sendet vetjake transportuesi është përgjegjës nëse vërtetohet që punonjësit e tij janë fajtorë. Në rast vonese të bagazhit të dorës zbatohet sipas rastit pika 2 e këtij neni.
4.Në rastet 1,2 dhe 3 të këtij neni, përgjegjësia e transportuesit për shkatërrimin, humbjen, dëmtimin ose vonesën kufizohet në 1200 euro për pasagjer. Ky kufizim nuk respektohet nëse në kohën kur bagazhi dorëzohet tek transportuesi, pasagjeri bën një deklaratë të veçantë interesi për dorëzimin në destinacion dhe sipas rastit paguan shumën shtesë.
Në këtë rast transportuesi paguan shumën e deklaruar, veç rastit kur ai provon se shuma e deklaruar është më e madhe se interesi aktual i pasagjerit.
5.Pika 4 e këtij neni nuk në rast se dëmtimet janë të qëllimshme ose shkaktohen nga neglizhenca e transportuesit, punonjësve ose agjenteve të tij.
6.Në rast dëmtimi pritësi i bagazheve ankohet tek transportuesi në çastin e zbulimit të dëmtimit, por jo më vonë se 7 ditë nga data e marrjes së bagazhit.
Në rast dëmtimi për arsye vonese ankimi duhet të bëhet brenda 21 ditëve nga data e marrjes së bagazhit. Nëse ankesa nuk bëhet brenda këtij afati nuk merret parasysh. Nëse pasagjeri e pranon bagazhin pa ndonjë rezervë, prezumohet se bagazhi është marrë pa dëmtime.
7.Në rast se bagazhi i dorëzuar ka humbur, kërkesa sipas pikës 1 të këtij neni bëhet vetëm nëse transportuesi pranon humbjen ose me kalimin e periudhës 21 ditore nga data kur bagazhi duhej të kishte arritur.
