Rusia nisi ditën e enjte sulmet ushtarake në Ukrainë, duke u futur nga jugu, lindja dhe veriu.
Bomba e raketa të ndryshme janë parë duke fluturuar nëpër qiell, ndërsa një gjë e tillë nisi nga urdhëri i presidentit rus, Vladimir Putin.
Sot po zhvillohet dita e tretë e luftës në Ukrainë dhe shumë gjëra kanë ndodhur brenda natës në kryeqytetin ukrainas, Kiev.
Pallati në Kiev u godit me dy raketa
Në orët e para të mëngjesit, në Kiev, një pallat shumëkatësh është goditur nga dy raketa. Ministria e Brendshme e Ukrainës ka publikuar pamjet teksa punonjësit e emergjencës bëjnë të mundur evakuimin e banorëve.
Franca dërgon armë në Ukrainë
Franca ka nisur armë dhe pajisje për të ndihmuar Ukrainën për luftën me forcat ruse. Presidenti Zelensky shkroi në Twitter se mëngjesin e së shtunës, kishte folur me presidentin e Francës pasi “filloi një ditë e re në vijën e frontit diplomatik”.
Autostrada në Kiev përfshihet nga zjarri
Një pjesë e autostradës Prospekt Peremohy afër qendrës së Kievit u shndërrua në një zonë lufte mbrëmjen e kaluar. Zjarret u ndezën përgjatë rrugës kryesore që kalon lindje-perëndim nga qendra e qytetit.
Ukrainasit ikin nga lufta
Shumë banorë të Kievit ishin larguar të premten. Më shumë se 50,000 refugjatë ukrainas janë larguar nga vendi në më pak se 48 orë, sipas Komisionerit të Lartë të Kombeve të Bashkuara për Refugjatët, i cili tha se shumica kanë shkuar në Poloni dhe Moldavi.
Presidenti sfidues
Presidenti ukrainas Volodymyr Zelensky u zotua të mbronte vendin e tij në një video të filmuar të premten në mbrëmje, ndërsa qëndronte në një rrugë të Kievit me drejtues të tjerë të administratës së tij. “Ne të gjithë jemi këtu për të mbrojtur pavarësinë tonë,” tha ai. “Lavdi Ukrainës!”
Banorët marrin armët
Ukrainasit janë përgatitur për të mbrojtur kryeqytetin e tyre ditët e fundit. Edhe anëtarët e parlamentit i thanë CNN se kanë marrë armët.
Ministri i Shëndetësisë: 198 ukrainas të vrarë, mes tyre tre fëmijë
Ministri i Shëndetësisë Viktor Lyashko ka bërë me dije se 198 ukrainas, mes të cilëve tre janë fëmijë, kanë vdekur si pasojë e përplasjeve me forcat ruse në Ukrainë. Ndër të tjera bën me dije se janë plagosur 1115 persona, mes të cilëve janë 33 fëmijë.
Lufta në Ukrainë, boshatisen marketet
Teksa vijojnë sulmet nga forcat ruse, autoritetet ukrainase i kanë bërë thirrje vazhdimisht qytetarëve që të mbyllen në shtëpi dhe të qëndrojnë në vendin më të sigurt që kanë brenda.
