Klea Huta dhe Elgit Doda ishin të ftuarit special të rubrikës “Ti mund të këndosh” në “E diela shqiptare”, ku kanë rrëfyer shumëçka për raportin si çift dhe marrëdhënien me të voglin, Krid. Gjatë bisedës të dy u vunë në siklet nga Ardit Gjebrea, i cili donte të provonte se sa e njihnin ata njëri-tjetrin dhe a bëhen xheloz.
Klea dhe Elgiti thanë se bëhen xheloz aq sa duhen, sepse duket se disa kufijë i kanë të caktuar qartë. Huta tregoi se ajo i ka “bërë gati Elgitit një listë” me këngëtaret, me të cilat ai nuk duhet të bashkëpunojë.
“Jo Giti e di vet, e ka listën gati se me kë nuk duhet të bashkëpunojë, unë nuk them asnjë fjalë më tepër”, tha Klea.
“Po, ma ka vënë aty sa hyn te dera. Dhe ato e dinë se kush janë. Kanë ardhur tek dera kanë parë listën dhe janë kthyer”, ka shtuar Elgiti me shaka.
E pyetur për arsyen, Klea tha se e gjithë kjo lidhet vetëm me profesionalizmin e këtyre këngëtareve.
“Ç’është e vërteta janë ca njerëz që nuk duhet të jenë aty sepse nuk kanë arsye për të qenë. Pra nuk kanë arsye për të qenë në tregun muzikor dhe nuk duhet të jetë Giti im, ai që duhet t’i lançojë për në treg”, u shpreh moderatorja.
Ka lidhje me profesionalizmin apo xhelozinë pak rëndësi ka, por e rëndësishme është që Elgiti qenka një bashkëshort i bindur!
