Edhe pse karriera e saj në Itali është në rrugë të mbarë, balerina shqiptare Klaudia Pepa është shprehur se, s ai përket jetës private, ajo e ndien mungesën e bashkëshortit të saj, Albi Nako.
Ajo ka tre vjet që është martuar me balerinin dhe koreografin Albi Nako. Angazhimet përkatëse në punë dhe largësia, Albi në Shqipëri dhe Klaudia në Itali, i kanë ndaluar dy të rinjtë që të jenë bashkë. Në një intervistë për të përjavshmen “Vero”, Klaudia ka folur edhe për planet në lidhje me zgjerimin e familjes së tyre:
“Unë kam tre vjet që jam martuar. Burri im, i cili punon si koreograf për një televizion, jeton në Shqipëri. Sapo kam pak kohë të lirë, unë marr avionin dhe fluturoj drejt tij. Si unë edhe ai kemi menduar për zgjerimin e familjes një ditë, por ne jemi duke pritur momentin e duhur. Tani jemi shumë të zënë me botën e kërcimit”.
Klaudia është shprehur gjithashtu se nuk është aspak mirë që të jetosh larg të dashurve të zemrës. Përveç bashkëshortit, edhe të afërmit e Klaudias jetojnë në Shqipëri. E vetmja mënyrë për të mbajtur kontakt të vazhdueshëm me ta është biseda me telefon. Balerina shprehet se do të ishte shumë e lumtur që një ditë pas punës të gjente në shtëpi të afërmit e saj.
“Nuk është mirë të jetosh larg nga të dashurit. Është mirë që t’i kesh afër pasi të kesh mbaruar punë. Por për momentin nuk është e mundur. Sigurisht i dëgjoj në telefon, por nuk është e njëjta gjë. Sa herë që më ndodh një gjë e mirë, të afërmit e mi janë të lumtur”.
Burimi: Fanpage.it
