Këngëtari shqiptar Shpat Deda, i njohur për zërin dhe stilin e tij të veçantë të të bërit muzikë duket se ka tërhequr vëmendjen e këngëtares së njohur britanike, Joss Stone. Stone është takuar me artistin shqiptar gjatë vizitës së saj në Kosovë, në vitin 2016.
Dyshja e artistëve jo vetëm janë takuar me njëri-tjetrin, por kanë realizuar edhe një bashkëpunim i cili është xhiruar në Prishtinë, poshtë statujës së Skënderbeut. Ka qenë pikërisht këngëtarja e njohur e cila së bashku me videon është shprehur me superlativa për Shpatin, duke vlerësuar edhe njëherë zërin e tij karakteristik.
“Mbrëmje e bukur në Kosovë në 2016-tën, ku u takuam me kantautorin Shpat Deda. Shumë prej këngëve të tij janë të bazuara në ndjenja dhe ngjarje të vërteta, dhe me një muzikë si kjo është e pamundur të mos shprehësh emocion. Me zërin e tij karakteristik dhe harmonitë e këndshme, ishte moment perfekt për këtë pjesë të Total World Tour. Një bashkëpunim i këndshëm me një person të këndshëm. Shpresoj t’ju pëlqejë”.-ka thënë Stone.
Në video Joss shihet se mban në duar një bllok, në të cilin është i shkruar teksti i këngës “Kosovo” në gjuhën shqipe. Artistja jo vetëm këndon në shqip, por në fund të videos thotë edhe ‘faleminderit’.
