Më 3 shtator, në Vatikan do të mbahet “Himni për Nënë Terezën”, ku do të marrin pjesë shumë artistë të njohur botërorë. Kështu u bë me dije gjatë një konference për media të organizuar nga Ipeshkvia e Kosovës.
Në shpalosjen e programit të koncertit, producentja Diana Toska tha se në mesin e artistëve të njohur ndërkombëtarisht, do të performojnë edhe Rita Ora me Inva Mulën, si dhe emra të tjerë të njohur. Gjithashtu, në këtë koncert do të marrë pjesë edhe Lorik Cana, i cili do të recitojë një poezi kushtuar Nënë Terezës, shkruan “Kosova Press”.
Sekretari i Ipeshkvisë së Kosovës, Don Fatmir Koliqi, tha se viti 2016 do të shënohet në kishën katolike shqiptare si shumë i rëndësishëm, pasi në këtë vit do të bëhet shenjtërimi i Nënë Terezës. Organizatorët e koncertit, kushtuar humanistes shqiptare, kanë thënë se po përgatiten për një atmosferë sa më të mirë.
Transmetimi i koncertit, do të bëhet në televizionet e huaja dhe në ato të trojeve shqiptare.
