“Ajo është një udhëtare në kohë, e dërguar në Tokë për të na shpëtuar”.
Kjo është teoria më e fundit që po qarkullon në internet rreth figurës së Greta Thunberg, aktivistes së re që po lufton për mjedisin.
Ideja e çuditshme lindi në mendjen e njerëzve, pas një fotoje të habitshme që po qarkullon në rrjetet sociale.
E nxjerrë nga arkivat e Universitetit të Uashingtonit që datojnë në vitin 1898, fotoja tregon tre të rinj që nxjerrin ujë nga një pus në Kanada.
Një nga ta, është një vajzë, tepër e ngjashme me Gretën, madje ka dhe gërsheta.
Përballë këtij zbulimi, shumë përdorues po ngrenë hipoteza nga më të ndryshmet. Disa janë të bindur se vajza e re në foton 120-vjeçare është Thunberg dhe se ajo është “dërguar në Tokë për të na treguar të ardhmen”.
“Nuk ka dyshim, ajo është një udhëtare e kohës, ajo pa se çfarë na pret dhe u dërgua këtu për të na paralajmëruar”, shkruhet gjithandej në mediat sociale.
Megjithatë, ka edhe nga ata që paralajmërojnë me maturi: “Është identike, fytyra e saj me siguri do të jetë bërë me Photoshop”.
