“Ju mund të debatoni se cili shtet ka zyrën e qeverisë më të zbukuruar: Elizeja e praruar, fortesa e Kremlinit apo Holli i Madh i Popullit në Pekin. Por asnjë lider nuk ka një zyrë si Edi Rama, kryeministri i Shqipërisë”. Ky nuk është një i shkrim i mediave shqiptare, por nisja e artikullit të “The Guardian” për kreun e qeverisë shqiptare.
“Muret e zyrës së tij në Tiranë janë mbuluar me qindra vizatime: shumëngjyrëshe, abstraksione të forta. Muri, zbulohet, se është dizajn i vetë kryeministrit”, shkruhet në artikullin e gazetarit Jason Farago, i cili ka zhvilluar edhe një bisedë me Edi Ramën. “Nëse arti nuk e bën politikën më të arsyeshme, politika, me çmendurinë e saj, mund ta bëj ndonjëherë artin më të mirë”, citohet kryeministri.
Intervista është realizuar para se Rama të hapte në galerinë “Marian Goodman Gallery” të Nju Jorkut ekspozitën e tij.
“Rama po përgatitet për të hapur ekspozitën e parë në Shtetet e Bashkuara. Është padyshim kreu i parë i një shteti që hap një ekspozitë të tillë në një prej galerive më të famshme në botë; as George W.Bush, që nisi të pikturojë vetëm pasi mori Presidencën, nuk mundi të ekspozojë veprat jashtë librarisë së tij në Dallas”, vijon artikulli.
Në të flitet për 11 vitet e Edi Ramës në krye të Bashkisë së Tiranës, ngjyrosjen e pallateve të kryeqytetit, si dhe ardhjen në pushtet në vitin 2013, reformat dhe ambiciet euro-integruese të vendit.
“Shqipëria është ende e varfër dhe korrupsioni vijon të jetë endemik megjithëse vendi ka bërë progres. Shqipëria po troket në dyert e Bashkimit Europian, ku shumë vende dëshirojnë të anëtarësohen, pavarësisht Brexit”, përfundon artikullin me titull “Njihuni me Edi Ramën, kryeministrin artist të Shqipërisë” i “The Guardian”.
Burimi: The Guardian
