Ish-deputeti i Partisë Demokratike Sokol Olldashi është përkujtuar nga miqtë dhe familjarët ditën e sotme, në pesë vjetorin e ndarjes së tij nga jeta. Mesila Doda përmes një statusi në “Facebook”, shprehet se ikja e tij ishte një keqkuptim dhe se dëgjon më shumë njerëz të thonë “sikur të ishte gjallë”.
“U bene 5 vite pa ty shok, sa më shumë kohë kalon, aq më shumë dëgjoj njerëz të thonë: “sikur të ishte gjallë”. Kam menduar gjithmonë që ikja jote e pakohë ishte keqkuptim, gjithçka do ishte ndryshe e më e mirë në këtë botë nëse një njeri si ti do ishte ende. Paqja e Zotit qoftë me ty Sokol. Ne të gjallët luftojmë ende derisa të marrim frymë. Tek e fundit jeta është një betejë pa fund dhe ti i përkisje atij lloji luftëtarësh që betejat e tua i bëje me mendje e zemër. Pusho në paqe vlla, kjo botë është kaq ndryshe qysh kur ike ti.” – shkruan Mesila Doda.
Sokol Olldashi humbi jetën në 20 nëntor të vitit 2013, në një aksident rrugor. Aksidenti ndodhi në mbrëmje vonë dhe shkak i tij u tha se ishte lagështia dhe shpejtësia e lartë me të cilën Olldashi ka udhëtuar, makinat e të cilit u rrëzua 20 metra poshtë në humnerë.
