Seriali “Si n’jetë”, një prodhim i Anabel Entertainment Studio, me autore Dalina Buzin, ka përfunduar me sukses sezonin e dytë, duke përmbyllur aventurat e vajzave më të famshme të ekranit; Megi, Viola, Dea, Ana dhe Alberta.
Ndonëse seriali zgjati për më shumë se dy muaj, mbyllja e tij u duk disi e papritur në një kohë që vajzat sapo e kishin dekoruar shtëpinë ku do të banonin dhe kureshtja për të parë sesi do të bashkëjetonin ishte e madhe.
Vëmendje kanë tërhequr edhe disa postime të protagonisteve të “Si n’jetë”, të cilat kanë njoftuar shkëputjen e marrëdhënies së punës me Anabel në profilet e tyre në Instagram. (Lexo këtu)
Të kontaktuara nga “Iconstyle.al”, vajzat refuzuan të jepnin më tepër detaje lidhur me këtë zhvillim.
Mirëpo, sot njëra prej vajzave të grupit, Megi Pojani, ka folur në emisionin e pasdites “Rudina” për mbylljen e sezonit dhe largimin e tyre nga “Anabel Entertainment”.
Megi rrëfeu se nuk është më pjesë e kësaj kompanie pasi kishte ardhur momenti të largoheshin, megjithatë vazhdon të jetë falenderuese për gjithçka deri më sot.
“Unë di të them që nuk jam më pjesë. Kur njeriu di më mirë, bën më mirë dhe unë nuk dua ta komentoj më gjatë. Mua më pëlqen që thjesht të vazhdoj të bëj punën time. Unë nuk jam më pjesë e asnjë prodhimi që mban emrin e asaj kompanie.
Unë jam shumë mirënjohëse dhe di të them ‘faleminderit’. Nuk jam personi që di të them ‘Unë bëra’ apo ‘Mua më bënë’, megjithatë unë e di që kudo që të jem, në çfarëdolloj vendi, edhe në rrugë të dal tani, unë do ta bëj gjënë time dhe do ta bëj njësoj po aq mirë dhe që njerëzit do ta pëlqejnë.”- u shpreh ajo.
E pyetur nëse i vjen keq që nuk është më pjesë e kompanisë dhe që u mor ky vendim, Megi u përgjigj:
“Çdo gjë ka fazat e veta. Kishte ardhur momenti.”- duke rrëfyer se ka ndërmend të bëjë diçka të re në televizion, mirëpo mbetet për t’u parë me kohën.
Aktualisht Dalina Buzi po punon për të sjellë një tjetër serial në jetë që quhet “$NOB” dhe që pritet të jetë po aq i suksesshëm.
https://www.instagram.com/p/CA7qyVOBL62/?utm_source=ig_embed
Deri më tani dihet se ky projekt i ri do të jetë një prodhim i Anabel Entertainment Studio dhe Nilor Film, ndërsa audicionet kanë disa javë që kanë nisur, që do të thotë se do të shohim disa personazhe të rinj!
Xhirimet do të nisin së shpejti dhe pritet që ky projekt të jetë pikënisja për një serial të mirëfilltë filmik, i cili i mungon tregut shqiptar.
