Jonida Maliqi më datën 16 maj pritet që të përfaqësojë Shqipërinë në skenën e madhe të Eurovizionit me këngën “Ktheju Tokës”, në Tel Aviv.
Dhe për herë të parë sot, dizajnuesit të cilit Jonida i ka besuar paraqitjen ka treguar detaje nga veshja e saj. I ftuar në emisionin “Klubin e Mëngjesit” në “Club FM”, Ardi Asllani tregoi se paraqitja e saj do të ketë elementë tradicionalë.
“Veshja ka elementë metalikë të punuar nga artisti Pirro. Elementë të aksesorëve ilirë i kemi marrë dhe i kemi sjellë tek veshja e Jonidës”, tha Asllani.
Gjithashtu ai foli edhe për marrëdhënien profesionale mes tyre dhe nëse ishte e vështirë të punoje me këngëtaren shqiptare.
“Kisha dy javë që prisja Jonidën të vinte të shihte fustanin. Ju e dini që ajo është një vajzë detajiste dhe me shije. Kishte parë skicat, por nga skicat deri tek realizimi ka ndryshime. Tani që e pa ndihem më i qetë, sepse e kemi ndarë të dy këtë moment. Ndoshta unë do mund ta bëj dy herë ‘Eurovizionin’, por për Jonidën është hera e parë që shkon në ‘Eurovizion’ dhe dua që gjithçka të jetë perfekte”, tha Ardi Asllani.
Kënga “Ktheju Tokës” u rendit e 14-ta dhe do të prezantohet në festivalinin europian të këngës në gjysmëfinalen e dytë.
