Ning Zhu, një infermiere në Wuhan, qyteti kinez ku shpërtheu Koronavirusi vdekjeprurës, është infektuar vetë dhe është mbyllur në shtëpi me javë të tëra që nga 26 janari.
Por si infermierja Ning ka dhe qindra raste të tjera të stafit mjekësor që është infektuar me Koronavirusin në Kinë, dhe që po shkakon një tjetër krizë në vend.
Të premten, u zbulua se 1,716 punëtorë të kujdesit shëndetësor në mbarë vendin ishin infektuar nga virusi, gjashtë prej të cilëve kishin vdekur, sipas Komisionit Kombëtar të Shëndetit të Kinës (NHC).
Gati 90% (87.5%) e mjekëve vinin nga provinca Hubei, ku Wuhan është kryeqyteti.
Punëtorët e kujdesit shëndetësor janë përballur prej kohësh me një rrezik të lartë të infeksionit gjatë shpërthimeve të mëdha, duke përfshirë edhe epideminë e rëndë të sindromës akute të frymëmarrjes (SARS) që përfshiu Kinën nga fundi i vitit 2002 deri në 2003-shin.
Në Wuhan, epiqendra e shpërthimit të Koronavirusit, ky rrezik po përkeqësohet nga një mungesë e madhe e burimeve mjekësore për të përballuar fluksin e pacientëve, si dhe paralajmërimin e vonuar të qeverisë për shkallën e lartë të infeksionit.
Vetëm në Wuhan, janë infektuar 1,102 punëtorë mjekësorë, që përbëjnë 73% të të infektuarve në provincë dhe 64% në shkallë vendi.
Qyteti i 11 milionë njerëzve ka 398 spitale dhe afro 6,000 klinika. Sidoqoftë, Komisioni Shëndetësor Komunal Wuhan ka caktuar nëntë spitale për të trajtuar rastet e koronavirusit, si dhe një 61 spitale shtesë, klinikat ambulatore të të cilave do të marrin pacientë me ethe – që besohet se janë një simptomë e zakonshme e sëmundjes së pneumonisë.
/CNN
