Pas rikuperimit nga COVID-19 Kina u erdhi në ndihmë shteteve të ndryshme që po kalojnë të njëjtën situatë si ajo, duke u dhuruar teste apo edhe duke dërguar grupe mjekësore në vendet që kanë më shumë nevojë.
Ditën e sotme Instituti i Shëndetit Publik bëri me dije se Kina i ka dhuruar vendit tonë 1000 teste për COVID-19, teksa e ka quajtur “një vend i madh dhe me zemër edhe më të madhe”.
Testet e dhuruara për vendin tonë
Mirëpo, kjo u shoqërua me disa polemika nisur nga faktet se disa shtete kanë deklaruar se testet e marra nga Kina janë jo funksionale.
Spanja
Ekspertët e mikrobiologjisë në Spanjë thanë disa ditë më parë se 640,000 testet e shpejta për të identifikimin e COVID-19 të blera nga Bioeasy në Kinë nuk funksionojnë.
Gazetat spanjolle shkruajnë se testet kishin një saktësi vetëm prej 30%, teksa Qendra për Kontrollin dhe Parandalimin e Sëmundjeve në SHBA ka deklaruar se testet e shpejta kërkohet të kenë saktësi në shkallën 80%.
Pas kësaj, Business Insider raporton se erdhi edhe reagimi i Ambasadës kineze në Spanjë që deklaroi se furnizimet mjekësore që Kina po i dhuronte për vendet e tjera nuk përfshinin produkte Bioeasy, kompania që i kishte shitur kitet Spanjës.
Më tej në deklaratën e saj shkruante se Ministria Kineze e Tregtisë i dha Spanjës një listë të firmave prodhuese dhe se Bioeasy nuk ishte në mesin e tyre, duke shtuar se nuk i ishte dhënë një licencë nga Administrata Kombëtare e Produkteve Mjekësore të Kinës për të shitur produktet e saj.
Reagimi i Bioeasy
Disa ditë më vonë kompania kineze që furnizoi Spnjën me testet e shpejta, Shenzhen Bioeasy Technology, deklaroi për Reuters se rezultatet e pasakta mund të kenë ardhur nga dështimi i mbledhjes së mostrave ose përdorimi jo i duhur i kutive.
Si kryhen këto teste?
Testi kryhet duke zhytur një shtupë me një mostër të pështymës së një pacienti në një ekstraktim proteinik që jep indikacione me ngjyra të pranisë së virusit.
Metoda e shpejtë është thelbësore për ekzaminimet urgjente nga spitalet dhe prodhojnë një diagnozë në 15 minuta.
Këto hapa drejt testeve të shpejta u bënë pasi metodat e testimit masiv dëshmuan thelbësore në përpjekjen e suksesshme të Koresë së Jugut kundër koronavirusit dhe ato rekomandohen nga Organizata Botërore e Shëndetit si një mënyrë thelbësore për të kontrolluar përhapjen e pandemisë.
Republika Çeke
Sakaq, i njëjti problem është hasur edhe në Republikën Çeke, ku 150,000 teste të blera nga Kina kanë rezultuar të gabuar në një shkallë prej rreth 80%.
Gazeta çeke ‘Czecheke Expats.cz’ shkruan se testet mund të japin një rezultat në 10 ose 15 minuta, por zakonisht janë më pak të sakta se testet e tjera dhe për shkak të shkallës së lartë të gabimit dhe vendi do të vazhdojë të mbështetet në testet laboratorike, nga të cilat ata kryejnë rreth 900 në ditë.
Zëvendëskryeministri dhe ministri i Brendshëm çek Jan Hamacek tha se firma prodhuese mund të ketë përdorur një metodologji të gabuar dhe testet mund të përdoren ende për personat e të cilët do i nënshtrohen testit për të dytën herë, pasi kanë rezultuar negativ në testin e parë.
Sipas Hamacek, fakti që testet nuk funksionojnë në shkallë të madhe nuk përbën ndonjë zbulim skandaloz.
Filipinet i kërkojnë falje Kinës
Kështu, testet që Kina u dhuron vendeve të tjera nuk janë të prodhuara nga Bioeasy, por nga BGI, e cila ka njoftuar të premten se ka marrë autorizim nga Administrata e Ushqimit dhe e Barnave të SHBA (FDA) për prodhimin e tyre.
Foto nga firma BGI
BGI deri më tani ka prodhuar më shumë se 7 milionë kite që janë përdorur për gati 580,000 njerëz në Kinë gjatë luftës epidemike dhe po ashtu, këto kite janë duke u përdorur në 70 vende të tjera, përfshirë Japoninë, Brunei, Tajlandë, Emiratet e Bashkuara Arabe, Egjiptin dhe Perunë.
Mes vendeve që kanë marrë teste falas janë edhe Filipinet, që nisur nga ajo që raportonin vendet e tjera hodhi akuza ndaj Kinës, se testet nuk ishin të sakta.
Ambasada e Kinës në Manila hodhi poshtë këto akuza, duke thënë se kutitë ishin në përputhje me standardet e Organizatës Botërore të Shëndetit dhe se ata kishin luajtur “një rol të rëndësishëm” në mundësimin e qeverisë së Filipineve të merrej me epideminë Covid-19.
“Cilësia e 2,000 kompleteve të provës nga BGI Group, dhe 100,000 kompleteve të provës së acidit nukleik nga Sansure Biotech është shumë e mirë dhe nuk ekziston asnjë problem saktësie,” tha ajo.
Pas verifikimeve, rezultoi se Kina kishte të drejtë dhe Departamenti i Shëndetit i Filipineve të dielën kërkoi falje për komentet e bëra një ditë më parë.
Kështu, nuk ka asgjë për tu shqetësuar rreth testeve të ardhura në vendin tonë, pasi ato janë prodhuar nga BGI, të aprovuara nga FDA amerikane dhe nuk janë teste të shpejta, por përdorin metodën PCR, e cila kërkon 3 orë për të dhënë rezultatet dhe për më tepër këto teste janë miratuar edhe nga FDA amerikane dhe OBSH.
/Gazetareforma.com
