Pa mbushur të 20-tat, Olsi Bylyku, i njohur ndryshe me pseudonimin Kimikati në spektaklin “Portokalli”, u kthye në një personazh të preferuar me humorin dhe batutat e tij. Por nga ana tjetër, ai është edhe një talent i vërtetë në rap.
Këtë e ka dëshmuar përmes dy bashkëpunimeve në muzikë në të kaluarën, një prej të cilëve me Bes Kallakun dhe të tretin e prezantoi mbrëmjen e së mërkurës në emisionin “Top Magazine”.
Kënga e titulluar “Kush jam unë” fokusohet te personazhi i tij, kush është në të vërtetë Kimikati sot dhe si ka ndryshuar nga dje.
Por fama e Olsit nuk është vetëm meritë e tij, por edhe e të ëmës, Violeta Bylyku, e cila u shfaq për herë të parë në publik.
“Mami është fuqia e çdo çuni shqiptar. Po nuk qe mami, çunat nuk bëjnë asgjë…”, tha Olsi për të ëmën.
Ndërsa kjo e fundit tregoi sa krenare është për të birin:
“Po e përjetojmë shumë mirë suksesin e tij. Olsi i tillë ka qenë, njëlloj siç është në ‘Portokalli’, këto gjëra bënte që fëmijë”.
Por një nga gjërat që prek më shumë Kimiatin dhe të ëmën është i ati invalid, prej të cilit pret gjithnjë një mesazh pasi përfundon performancën.
“E kam shumë të rëndësishme këtë. Sa herë bëj një material të mirë, babi më çon gjithmonë një mesazh: ‘Ma njalle zemrën me këtë video’. Nëse e njallmja e zemrës së tij është një nga gjërat e mira që bëj, atëherë gjithë jetën do bëj vetëm gjëra të mira”, tha Olsi.
