Para disa ditësh në media u shpërnda me shpejtësi një foto e pa edituar e Khloe Kardashian, në të cilën shfaqej trupi i saj i vërtetë. Fotografia u publikua padashje në rrjete sociale nga një asistente e saj dhe më pas skuadra e Khloe-s u angazhua e gjitha për ta fshirë sa më parë.
Pas gjithë zhurmës që u bë në rrjet nuk mungoi edhe një reagim nga Khloe Kardashian. Ajo publikoi në Instagram disa video live të trupit të saj, për të treguar se si është në realitet pa asnjë filtër.
“Në të vërtetë, presioni, tallja e vazhdueshme dhe paragjykimi për t’u dukur perfekte gjithë jetën dhe për të plotësuar standardet e të tjerëve se si duhet të dukem ka qenë shumë për t’u duruar. ‘Khloe është motra e shëndoshë’. ‘Khloe është motra e shëmtuar’. ‘Babai i saj duhet të jetë tjetër sepse ajo duket shumë ndryshe’. ‘Mënyra e vetme që duhet të ketë humbur peshë është operacioni’”, shkroi ajo në reagimin e saj.
Më pas Khloe e pranoi dhe vetë se i pëlqen që të editojë fotot, siç i pëlqen të bëjë grimin apo të rregullojë thonjtë e saj. Ajo u shpreh se kjo është mënyra se si i pëlqen ta shikojë bota dhe është zgjedhja e saj se çfarë bën me fotot, trupin apo gjithçka tjetër, që i përket vetëm asaj.
View this post on Instagram
Në këto momente të vështira, Khloe ka pasur gjithmonë pranë familjen e saj, që e ka mbështetur në çdo hap. Për ta treguar këtë gjë para gjithë botës, Kylie Jenner ka ndarë së fundmi në Instagram një foto shumë domethënëse me Khloe. Ajo ka publikuar një foto, në të cilën dy motrat shfaqen duke shtrënguar fort duart me njëra-tjetrën.
“Është diçka e përhershme”, ka shkruar Kylie përkrah fotos, duke nënkuptuar se Khloe nuk do të jetë kurrë vetëm dhe se do të ketë gjithmonë mbështetjen e saj.
