Aktivitetet e organizuara për të rinjtë vlejnë si një shtysë në angazhimin dhe motivimin e tyre. “Miss & Mister Durrësi” organizoi eventin e tij të 15-të në Pallatin e Sportit, “Ramazan Njala”, ku morën pjesë 15 çifte.
Audicionet për pjesëmarrjen e djemve dhe vajzave u hapën në shkurt, ndërsa gjatë gjithë muajit mars ata punuan për provat e spektaklit, që u finalizua dje më 31 mars.
Pjesëmarrësit e eventit të bukurisë sfiluan me katër veshje të ndryshme, ndërsa spektakli mblodhi ndër të tjerë edhe tre personazhe të njohur të muzikës shqiptare: Anxhela Peristerin, Blerina Brakën dhe Erik Lloshin.
Tre këngëtarët i dhanë më shumë atmosferë eventit bashkë me numrin e kërcimit të rrymës latine.
12 anëtarët e jurisë, mes të cilëve fotografi Sonny K. Elson dhe fituesi i “Mister Durrësi 2016”, njëherësh model i “ICON Agency”, Erald Farruku, ndanë disa çmime për konkurrentët, mes të tjerëve atë kinematografik, të simpatisë, të elegancës, të buzëqeshjes, të miqësisë, të sharmit, të ecjes dhe të inteligjencës.
Kurora dhe çmimi i rëndësishëm iu dha të rinjve, Greta Jaku dhe Klausen Gjeta, përkatësisht “Miss Durrësi” dhe “Mister Durrësi” për vitin 2017.
Burimi: Iconstyle
