Dy aktorët e filmit “Fifty Shades Of Grey”, Jamie Dornan dhe Dakota Johnson ishin në Nisë, Francë, gjatë kohës që ndodhi sulmi terrorist. Ata po filmonin pjesën e tretë të filmit, që pritet të dalë vitin e ardhshëm.
Jamie Dornan dhe Dakota Johnson u filmuan në një skenë romantike me varkë afër Saint-Jean-Cap-Ferrat, vetëm disa orë përpara se të paktën 84 persona të vriteshin nga një terrorist, i cili përplasi kamionin drejt një turme të madhe njerëzish që po festonin, të enjten.
Producenti i filmit Dana Brunetti konfirmoi në mediat sociale se të gjithë pjesëtarët e kastit të përfshirë në film, ishin të sigurt.
“Nga produksioni konfirmohet se të gjithë ata që punojnë në jug të Francës janë në rregull”, thuhet në mesazhin e publikuar.
Në Nisë të Francës, natën e sulmit ndodhej edhe këngëtarja Rihanna, e cila anuloi koncertin e saj për fansat, si pasojë e pasigurisë në vend. Ajo mbërriti në Nisë, vetëm pak orë përpara se të ndodhte sulmi terrorist, nga i cili humbën jetën 84 persona.
