Lajmi më i përfolur, ditët e fundit në mediat shqiptare është ai për Ballistin Morinën. Por ditën e sotme avokati i tij, Darko Butigan, bëri të ditur një kërkesë që nuk e prisnim.
Ballist Morina ka kërkuar zyrtarisht azil politik në Kroaci. Kërkesa e bërë nga avokati gjatë një bisede telefonike me “News 24”, vjen në një moment kur për të penguar ekstradimin e Ballistit në Serbi janë angazhuar institucionet më të larta në Shqipëri, si Ministria e Drejtësisë dhe vetë kryeministri.
Për shkak të këtyre ndërhyrjeve, gjykatësi Pero Miloglav, në Dubrovnik ka thënë se vendimi për të do të merret nga instanca më të larta siç është Gjykata e Lartë e Zagrebit.
Me shumë mundësi kërkesa për ekstradim do të hidhet poshtë. Në të njëjtën kohë familjarët e Ismail Morinës po bëjnë presion, që ai të mos ekstradohet në Beograd. Ata madje kanë kërcënuar me vetëflijim nëse diçka e tillë ndodh.
