Milaim Zeka, deputeti i Nismës Social Demokrate në Kosovë është arrestuar ditën e sotme, rreth orës 09:00 nga policia. Arrestimi i tij u bë pasi një prokuror i Prokurorisë Themelore në Prishtinë lëshoi një urdhër arresti në emër të tij.
Zeka kishte kërcënuar publikisht në ekranin e “Televizionit 7” prokurorin Afrim Shefkiu, duke thënë se kishte hesape për të larë me të dhe për këtë arsye ai u ndalua ditën e sotme.
“Më përpara e falja nëse më vriste njërin nga fëmijët sesa kështu duke u shkatërruar ëndrrat njerëzve . Mua më kanë poshtëruar. Unë do ta ndjek këtë prokurorin me gjyq, me kanun edhe privatisht. Nuk i’a fal kurrë poshtërimin. Se njerëzit tani thonë për mua: ‘Shiheni ky hajduti i vizave’ ”, ka thënë Zeka në emisionin DPT te Fidani në T7.
Ndërkohë zëdhënësi i Prokurorisë Speciale ka deklaruar sot: “Një prokuror i Prokurorisë Themelore ka lëshuar urdhër ndalesë për deputetin Milaim Zeka, i cili është arrestuar sot në mëngjes” .
Zv.kryeprokurori i Prokurorisë Themelore në Prishtinë, Ibrahim Berisha, tha për Televizionin 7 se aktualisht Zeka është nën arrest dhe i mbetet prokurorit përgjegjës të merret me hapat e mëtejshëm.
Prokurori Afrim Shefkiu, ka nxjerrë 907 dëshmitarë kundër Zekës. 900 prej tyre janë viktima të mashtrimit me viza pune në Gjermani të cilëve u janë marrë rreth 345 mijë euro.
Ndërsa dje Këshilli Prokurorial i Kosovës ka dënuar ashpër deklarimet publike dhe kërcënimet e drejtuara ndaj prokurorëve të shtetit, në veçanti, dënoi deklarimin kërcënues të deputetit të Nismës Socialdemokrate, Milaim Zeka, ndaj prokurorit të Prokurorisë Speciale të Republikës së Kosovës, Afrim Shefkiu.
