Një tjetër gazetar shqiptar është kërcënuar me armë. Bëhet fjalë për gazetarin e “Report Tv”, Julian Shota, i cili është kërcënuar gjatë detyrës.
Ai kishte shkuar bashkë me ekipin e xhirimit në ambientet e një lokali në lagjen nr.4 në Laç, pas një shpërthimi me tritol që ndodhi atje.
Lënda plasëse ishte vendosur tek hyrja e lokalit në pronësi të Llesh Burakut, 53 vjeç, banues në Laç, i cili dyshohet se ka kërcënuar gazetarin me jetë.
Fillimisht 53-vjeçari ka filmuar me telefon automjetin e gazetarit të “Report Tv”, Julian Shota, duke e kërcënuar se nëse transmeton ngjarjen në televizion, do të ketë punë me të.
Si të mos mjaftonte kjo, Llesh Buraku ka nxjerrë edhe një armë zjarri tip pistoletë, të cilën ia ka drejtuar gazetarit duke e kërcënuar me jetë.
Në atë moment kanë ndërhyrë disa të afërm të 53-vjeçarit, duke i bllokuar krahun për të mos lejuar përshkallëzimin e situatës. Nën kërcënimin e armës, Buraku ka kërkuar që t’i dorëzojnë edhe telefonat.
“Shqiptarja.com” shkruan as policia nuk do ta bënte publike ngjarjen. Shefi i komisariatit të Laçit, Erdit Rreçeku, i kontaktuar nga gazetarët për ngjarjen e rëndë, është përgjigjur se ndodhet me pushime.
“Jam me leje. Të fala”, ka qenë përgjigja e tij.
Burimi: Shqiptarja.com
