Evi Reçi gjithmonë ka mahnitur publikun me zërin, këngët e veçanta dhe stilin që e karakterizon.
Mes shumë angazhimeve të mëdha në fushën e muzikës dhe gazetarisë, Evi tashmë shënon dhe një tjetër sukses në karrierën e saj.
Asaj i është bërë një ofertë nga një prej radiove më të dëgjuar në Itali, “Radio Fiesole”, ku artistja u paraqit si e ftuar speciale dhe përshtypja që la te drejtuesit bëri që ata të ftojnë artisten të bëhet pjesë e stafit të tyre, madje tani ajo gëzon profesionin në një nga vendet më të mira të kësaj radioje.
Ajo tashmë është e pranishme një herë në javë në këtë radio, në të cilën do të prezantojë krah spikerëve të famshëm italianë Andrea Muzzi dhe Bruno Santini.
Për të gjithë shqiptarët që jetojnë në Itali, Evi tashmë do të jetë zëri ëmbël një javor, që do t’i shoqërojë të gjithë dëgjuesit e radiove në makina dhe shtëpitë e tyre, duke u komunikuar informacionet dhe ngjarjet interesante që kanë të bëjnë kryesisht me të rejat e fundit në Itali.
Ndërkohë, ajo vazhdon të jetë shumë e pëlqyer në tregun muzikor shqiptar si këngëtare. Projekti i saj i fundit mbetet “In my room”, një këngë e cila u mirëprit mirë nga publiku, dhe së shpejti priten projekte të reja muzikore nga ajo.
