Të gjithë kemi fobi diçka, të cilën shpesh mund ta arsyetojmë me ndonjë eksperiencë të pakëndshme nga e kaluara, por ndodh që edhe mos të kemi sqarim për të.
Fobi nga vendet e mbyllura, errësira apo lartësitë, janë disa nga frikat më të rastisura, por këngëtarja shqiptare Evi Reçi i “shokoi” të gjithë kur tregoi të sajën.
Reçi aktualisht jeton në Firence dhe është rikthyer në Shqipëri për të marrë pjesë tek “Kënga Magjike” me këngën “Dorëzohu”. Përpara se të fillonte konkurrimin te “E diela shqiptare”, Ardit Gjebrea i ka bërë Evit një lojë ku ka bërë të ditur edhe pikën e dobët të saj.
Përmes një loje me dy motra binjake në skenë, Arditi mësoi se këngëtarja Reçi ka fobi binjakët dhe se nuk arrin dot t’i shohë në të njëjtën kohë.
“E kam të pamundur të përqendroj shikimin. Si mund të jetë një njeri si një njeri tjetër?”, është shprehur këngëtarja, duke shtuar se në përgjithësi binjakët i shkaktojnë ankth.
