Ai u bë një nga personat më të famshëm në botë dhe të pasur, falë hapjes së një media sociale që sot udhëheq botën. Por Avril Lavigne është ndër të parat të famshme që merr guximin për t’iu kundërvënë themeluesit të “Facebook”-ut, Mark Zuckerberg. Këngëtarja pretendon se gjiganti i teknologjisë është duke promovuar bullizmin për shkak të një shakaje të bërë rreth grupit Nickelback.
Në një video të publikuar në “Facebook”, në të cilin prezantohej platforma e re “JARVIS”, Zuckerberg kërkoi që të luante një këngë të mirë të Nickelback.
JARVIS, përmes zërit të Morgan Freeman, u përgjigj: “Më vjen keq Mark, mendoj se nuk mund ta bëj atë. Nuk ka këngë të bukura të Nickelback”.
Lavigne, e cila ka qenë e martuar me vokalistin e grupit, nuk e ka marrë lehtë këtë shaka dhe ka reaguar menjëherë ndaj Zuckerberg, përmes rrjetit social “Twitter”.
“I dashur Mark. Shumë njerëz përdorin produktet tuaja, disa i pëlqejnë dhe disa jo. Nga ana tjetër edhe ti ke të drejtë të japësh mendimin tënd rreth muzikës, por shakaja juaj ndaj Nickelback ishe pa kripë. Një personazh si ty, duhet të jetë më përgjegjës për të mos promovuar bullizimin, veçanërisht në këtë kohë ku shihet çfarë po ndodh në botë”, shkroi këngëtarja.
Burimi: BusinessInsider
