Si mund të ndiheshit sikur ditën më të rëndësishme të jetës suaj, të merrnit vesh se vuanit nga një sëmundje e keqe? Kështu i ka ndodhur këngëtares së njohur Kelly Clarkson, e cila zbuloi një prej momenteve më të tmerrshme të jetës së saj, kur doktorët i thanë se mund të kishte kancer, por që më vonë sqaruan se ishin ngatërruar rezultatet.
34-vjeçarja ka thënë se e kishte tepër të vështirë ta përballonte shqetësimin e këtij lajmi dhe emocionet e ceremonisë së “Grammy Awards”, ku ajo fitoi çmimet “Best Female Pop Vocal Performance” dhe “Best Pop Vocal Album” në vitin 2006.
Në një intervistë të dhënë së fundmi ajo tregoi se mëngjesin e ceremonisë ishte lajmëruar për atë lajm të trishtueshëm.
“Isha gjithë ditën duke qarë. Më kanë lyer rreth 4 herë pasi makijazhi hiqej nga të qarat. Mendoja me vete se nuk e meritoja këtë gjë pasi isha shumë e re. Kur fitova dy çmimet, mendova me vete se Zoti po m’i jep këto për të më lumturuar para se ajo gjëja e tmerrshme të më ndodhë”, tregoi këngëtarja e hitit “Because of you”.
Ajo shtoi më pas se doktorët i kishin ngatërruar përgjigjen me dikë tjetër, por pavarësisht se u ndje e lehtësuar që nuk kishte atë sëmundje, ajo shprehet se për shkak të doktorëve, një prej eksperiencave të saj më të bukura, ishte shkatërruar.
Burimi: Daily Mail
