Këngëtari shqiptar, Valton Krasniqi ka akuzuar kolegen e tij Bebe Rexha se ka vjedhur një prej këngëve të tij.
I ftuar në emisionin “Express Rozë”, Valtoni tregon se kënga “Hey Mama” është marrë nga repertori i këngëve të regjistruara nga ai dhe i është shitur DJ të njohur David Guetta, i cili e këndon bashkë me këngëtaren shqiptare Bebe Rexha dhe Nicky Minaj.
“Pamë që kënga ishte shumë e ngjashme dhe bashkë me avokaten time bëmë gati procedurat gjyqësore. Por pamë që ajo kompani ishte mjaft e fuqishme, kompania që mbron këngëtarët dhe e pamë të arsyeshme mos të hapnim të tilla probleme”, ka thënë Valtoni.
Ndërkohë, kënga për të cilën flet Krasniqi mban vulën e David Guetta-s dhe është e publikuar në Youtube nën emrin e tij. Valtoni shprehet se nuk ka hequr dorë nga ndjekja e të drejtës së autorit dhe e ka dërguar këngën në një kompani zvicerane për të vërtetuar se është e vjedhur.
Ai shprehet gjithashtu se, i ka shkruar Bebe Rexhës në profilin e saj në “Facebook”, dhe ajo e ka parë por nuk i ka kthyer përgjigje. Ndiqni videon, minuta 46:00.
