Keith Flint iu lut bashkëshortes së tij që të pajtoheshin, pak ditë para se t’i jepte fund jetës në moshën 49-vjeçare.
Legjenda e grupit “Prodigy” madje kishte vonuar shitjen e shtëpisë së tyre 1.5 milionë paund në Essex, me shpresën që të ribashkohej me Mayumi Kai-n, me të cilën ishte ndarë vitin e kaluar.
“Keith gjithmonë shpresonte se mund ta bënin marrëdhënien e tyre të funksiononte dhe i telefononi disa herë, duke iu lutur. Por ajo nuk e ndryshoi mendjen dhe këmbënguli që ta shisnin shtëpinë. Kjo gjë shkatërroi Keith-in. Nuk duhet të fajësohet Mayumi, por duket se Keith nuk e mendonte se mund ta përballonte jetën pa të”, tha një burim për “The Sun”.
Shtëpia-fermë e shekullit të 15-të u nxor në shitje vetëm disa ditë më parë.
Ndërkohë dy foto të realizuara të shtunën e tregojnë Keith-in të lumtur, ndërsa ndodhej në një lokal duke pirë birrë me trajnerin e tij personal. Ai madje i kërkoi leje këtij të fundit nëse mund të merrte disa pije me vete në shtëpi.
Fotot janë bërë nga një klient i lokalit, i cili dëshmoi për “Daily Mail” se dy miqtë dukeshin të gëzuar, pasi këngëtari arriti një rekord në vrapim.
Keith Flint jetonte në shtëpi bashkë me 6 qen, ndërsa fqinjët e përshkruanin si një person të dashur.
Flint ka luftuar më parë me depresionin dhe rrëfeu pas martesës në 2006-n se Mayumin ishte shpëtimi i tij.
Burimi: Daily Mail
