Këngëtari i grupit të famshëm U2, Bono, humbi në mënyrë të papritur zërin e tij, duke u detyruar të ndërpresë datën e dytë të turit në Berlin, pak këngë nga fillimi i “live”-it.
“Na vjen keq për anulimin e mbrëmjes. Bono ishte në formë të shkëlqyer dhe mezi prisnim të këndonim ‘live’, por pas disa këngësh, pësoi një humbje të plotë të zërit. Nuk e dimë çfarë ndodhi dhe do të kërkojmë këshilla mjekësore”, shkroi grupi në rrjetet sociale.
E shtuna e 1 shtatorit ishte koncerti i dytë dhe i fundit i grupit në kryeqytetin gjerman, si pjesë e turneut të tij “Përvoja + pafajësi”. Por, pas këngëve të para, 58-vjeçari ndaloi këndimin dhe piu disa herë diçka për zërin. Më pas njoftoi se nuk mund të vazhdonte.
“Ne e vlerësojmë mirëkuptimin e publikut tonë dhe mbështetjen e të gjithë fansave tanë në Berlin, ne do t’ju informojmë shumë shpejt”, thuhet në deklaratë.
Ditën e djeshme ai siguroi se do t’i rikthehet shumë shpejt vazhdimit të turneut, tërësisht i rikuperuar.
“Kam takuar një doktor të mrekullueshëm dhe falë kujdesit të tij do të arrij të rikthej zërin, për të vazhduar turneun”, shkroi 58-vjeçari.
Në koncertin e parë në Berlin, Bono kishte dënuar dhunën e fundit të ekstremit të djathtë në qytetin gjerman të Chemnitz.
