Artisti i njohur shqiptar, Alban Skënderaj, i bëri surprizën e jetës, Sidorelës, vajzës së sëmurë e cila për vite me radhë nuk është ngritur nga shtrati i saj. Ajo dëshironte ta shihte njëherë nga afër kantautorin, muzika e të cilit i qetëson dhimbjet e turpit dhe të shpirtit.
“Unë e pëlqej shumë muzikën. Këngëtari im i preferuar është Alban Skënderaj dhe kam shumë dëshirë ta takoj njëherë. Çdo këngë e tij kur e dëgjoj, më duket se më lexon shpirtin. E nis ditën me këngët e tij. Kur nuk më zë gjumi dëgjoj këngët e tij. Kur jam me dhimbje, dëgjoj këngët e tij. Është një këngëtar, që lum ne që e kemi. Mjafton t’i dëgjoja njëherë zërin, se e kam dëgjuar gjithmonë duke kënduar. Të më merrte Albani mua në telefon? Thjesht do bllokohesha. Nuk do më besohej se do ishte ai. Do doja të ishte dikush pranë meje të më pickonte, të më thoshte, shiko se është vërtet Albani. Unë kur dëgjoj këngët e tij, humbas. Flasin njerëzit përreth, por une jam duke kënduar këngët e tij”, tregon Sidorela.
Në momentin kur Sidorela do dëgjonte në Ipad këngët e Albanit dera hapet. Shfaqet Alban Skënderaj. Ajo nuk e sheh, por i dëgjoi zërin dhe e njohu. Sidorela nuk përmban dot emocionet.
Ëndrra e saj u bë realitet. Një përqafim nga idhulli i saj, zëri i cilit i shëron shpirtin. Së bashku me Albanin flasin për muzikën e tij, veçanërisht për tekstet domethënëse. Sidorela ka fituar një mik të ri. Momenti më i bukur është kur këndojnë të dy këngën e preferuar të Sidorelës, “Dhurata”.
