“Kënga Magjike” është një ndër kompeticionet më të mëdha të muzikës shqiptare. Si në çdo konkurs tjetër edhe në muzikë debatet pas ndarjes së çmimeve janë të pranishme. Pakënaqësi ndaj çmimeve, ndaj mënyrës së votimit dhe të organizmit janë gjithmonë të pranishme, por cilat janë ato debate apo incidente që do të ngelin në memorien tonë, por edhe në historinë e “Këngës Magjike” ndër vite?
Në “Kënga Magjike” e viti 2015 nuk mund të harrohet incidenti që ndodhi mes dy këngëtarëve, Flori Mumajesit dhe Stines.
Në përfundim të votimeve, pa u shpallur ende fituesi i “Këngës Magjike”, Flori Mumajesi është nisur për të dalë nga Pallati i Kongreseve, por nga pas e ka ndjekur Stine , i cili pas disa batutash ofenduese e goditi me një send të fortë në fytyrë. Flori pësoi një çarje të madhe dhe u detyrua të shkojë në urgjencë ku i bënë disa qepje.
Shkak i sherrit kanë qenë pikët respektive që ata i dhanë njëri-tjetrit gjatë votimeve në “Kënga Magjike”. Stine i dha 26 pikë (nga 30 që janë maksimalet) Florit, ndërsa ky i fundit nuk i dha vetëm 2 pikë.
Gjithashtu “Kënga Magjike 2015” u shoqërua edhe me kontestime të shumta nga ana e këngëtarëve për këngën fituese të këtij edicioni. Për të dytin vit radhazi Aurela Gace mori kreun e “Këngës Magjike” me baladën “Akoma Jo”.
Repri i njohur 2po2 shkruajti aso kohe se Aurela nuk e meritonte këtë çmim dhe i gjithë spektakli ishte një hipokrizi.
Gjithashtu edhe këngëtari dhe humoristi Ermal Mamaqi u shpreh i pakënaqur nga emrat fitues të “Këngës Magjike 2015”.
Sipas Mamaqit, “Këngën Magjike” e fiton ai që ka më shumë miq dhe shoqëri. Madje ai e cilësoi atë festival si “Këngën Tragjike”. Gjithashtu në një status ai tha se duke parë “Këngën Magjike” i ikën dëshira për të kënduar live.
Në “Kënga Magjike 2016” në diskutimet tek “E diela shqiptare” u bë një debat i fortë, që degradoi deri në ofendime mes vëllezërve korçarë Endri dhe Stefi Prifti dhe këngëtarëve Bruno e Artiola Toska.
Këngëtari Bruno, i akuzuar nga vëllezërit Endri e Stefi Prifti se kënga e tij me Artiolën “Mirmëngjes dashni” ka motive sllave, u është kundërpërgjigjur të dyve duke i treguar se në fakt, janë këngët e dy korçarëve ato që janë të kopjuara.
Nuk ka nguruar aspak Bruno t’ua tregojë atyre me fakte ‘live’ se Endri dhe Stefi fillimisht duhet të shohin krijimtarinë e tyre, para se të akuzojnë pa të drejtë të tjerët.
Duket ‘e çuditshme’ në fakt akuza e vëllezërve korçarë, ku përveçse edhe në repertorin e tyre kanë këngë me motive popullore, madje edhe të marra nga të huajt, e dimë të gjithë se këngët tallava ata i këndojnë në çdo javë në club-et e natës ku performojnë.
Ata thanë se nuk këndojnë kurrë tallave, por kur Bruno u përmendi “Një unazë” të Muharrem Ahmetit përgjigja ishte: “A po atë e kemi fiksim. Dhe ne i këndojmë në orën 5:00 të mëngjesit”. Sipas logjikës së tyre kur këndohen në orën pesë nuk quhen më tallave.
Në “Kënga Magjike 2017” reagimet dhe pakënaqësitë ishin të shumta, sidomos të atyre këngëtarëve, të cilët janë cilësuar si emra të mëdhenj të muzikës shqiptare. Rovena Stefa, Evis Reçi, Çiljeta Xhilaga dhe Fjolla Morina, të cilët ia vunë fajin formulës së votimit dhe servilizmit që kanë këngëtarët ndaj njëri-tjetrit.
Një debat pikant pas “Këngës Magjike” tek “E diela shqiptare” ishte mes Ardit Gjebreas, Kastro Zizos dhe Klint Çollakt.
Kastro u shpreh i indinjuar për faktin që disa kolegë e kishin votuar me pak pikë dhe më saktë këngëtari Klint Çollaku, i cili e kishte votuar me një pikë.
“Më mirë më jep 0 pikë sesa 1 pikë!”, u shpreh Kastro.
Reagimi i Arditit ishte i menjëhershëm. Ai i nxori listën e pikëve që ka dhënë Kastro, ku shihet se dhe ai ka dhënë shumë pak pikë për Klint Çollakun. Ai i tha që më parë ta drejtojë gishtin nga vetja pastaj të shikojë se sa e kanë votuar të tjerët.
Nëse kthehemi pas në kohë, në “Kënga Magjike” 2012 problemi i votimit gjithashtu shfaqi shumë pakënaqësi pas përfundimit të kompeticionit.
Aso kohe Adrian Gaxha ka thënë se: “Këngëtarët votuan njëri-tjetrin si shokë dhe jo si muzikantë”.
Lynx: “Kolegët ndryshe u hoqën pas kuintave dhe ndryshe na votuan”
Devis Xherahu: “Kolegët nuk votuan me profesionalizëm, meritoja vendin e tretë.”
Enca Haxhia: “Duhej të ishim votuar më shumë nga kolegët”
Burimi: Iconstyle.al
