Dhjetë këngëtarë të huaj do të konkurrojnë këtë vit në festivalin “Kënga Magjike 2019”.
Këngëtarë të huaj do të sjellin projektin e tyre për t’u vlerësuar përballë jurisë profesioniste, që përbëhet nga: Armend Rexhepagiq, Jonida Maliqi, Arben Skënderi, Enkel Demi si dhe çifti DJ Miss Rose dhe DJ Stone.
Por këtë vit do të ketë një risi sa i përket prezantimit të artistëve të rinj. Ardit Gjebrea ka vendosur që këtë vit të mos i prezantojë paraprakisht artistët e kategorisë “New Artist”. Ata do të dalin para jurisë dhe publikut, do të performojnë, në shqip a në gjuhë të huaj dhe vetëm gjatë diskutimeve të Jurisë do të prezantohen.
Pra këtë vit do të dëgjojmë italisht dhe greqisht në skenën e festivalit, por edhe anglisht që duket që do të jetë gjuha e zgjedhur për këngët e shumë prej të huajve.
Sot në puntatën e parë të emisionit “E diela shqiptare” Armend Rexhepagiqi tha se mesa duket po synohet që Festivali të kthehet në internacional.
Duke marrë parasysh që pjesmarrja e artistëve të huaj nisi nga viti i shkuar, është e sigurt që festivali po ecën drejt hapave të suksesit ndërkombëtar.
/Tirana Post
