Këngëtari i parë shqiptar që ka konfirmuar pjesëmarrjen në Festivalin e Këngës në RTSH ka qenë Mentor Haziri.
Në një intervistë për “ABC e Mëngjesit” ai është shprehur se kënga është gati, të cilës vetë ai i ka realizuar tekstin dhe muzikën.
Ndërkohë, artisti ka thënë se nëpërmjet kësaj kënge përcillet një mesazh shprese duke e lidhur me situatën e vështirë që është krijuar nga pandemia.
“Kam vendosur dhe po ta them ty që do marr pjesë. Këngën e kam përfunduar, është një këngë që e kam bërë vetë. Kam shkruar tekstin dhe muzikën, kurse e kam orkestruar në Irlandë. Orkestrimin dhe miksimin e ka bërë prioducenti im Dejvid Mekju, e përshëndes shumë. Kurse koret e këngës i ka bërë fituesja e The Voice of Irland, që është mikeshë e imja. Është një këngë e jashtëzakonshme se përçon mesazh shprese në kohën e pandemisë. Është një këngë që i kushtohet situatës së Covidit. Një këngë falenderuese për gjithë mjekët që kanë bërë punën e tyre të jashtëzakonshme, kanë luftuar në front të parë me virusin. Kështu që është një këngë që ka mesazh shpresën, dashurinë dhe atë mesazhin që do të bëhet mirë, mos u dorëzoni se do i rikthehemi jetës normale”, deklaroi Mentori.
