Bluzat e bardha kanë zhvilluar një takim që ka zgjatur më pak se 60 minuta me ministren e Shëndetësisë Ogerta Manastirliu në lidhje me plotësimin e 4 kërkesave të tyre.
Në takim ishin të pranishëm drejtori i QSUT-së Enkelejd Joti, zv. Ministrja e Shëndetësisë Mira Rakacolli, Arben Gjata, mjeku Gent Stroni dhe disa mjekë të tjerë.
Pas takimit, mjeku i Spitalit Infektiv, Gent Stroni, tha se në takimin e sotëm u dorëzuan draftet dhe të hënën pritet që të ngrohen grupet e punës për të bërë specifikimet e duhura.
Duke thënë se mjekët shqiptarë janë më pak të paguarit në rajon, Stroni u shpreh se nuk është kundër rritjes së pagës me 40 %, premtim ky nga kryeministri Rama, por shtoi se po diskutohet që të rritet në maksimum dhe brenda mundësive, qoftë “nga 40 % i premtuar, të bëhet 41 %”.
“Sa i përket çështje se pagës rritje ne 40%, përfaqësuesi i mjekëve tha që ne kemi argumentet të tjera. Ne jemi vendi me pagat me të ulta ne rajon, ku është një argument që duhet parë. Pse 40% dhe jo 41%?.U la që në të hënën të jepen emrat e grupeve të punës nga ana jonë. Sot u argumentua dhe vendosëm vetëm se si do të vazhdojë dhe çfarë do të bëjmë nga e hëna e më pas. Do të ngremë disa grupe pune për të shqyrtuar kërkesat tona. Drafti ynë do të ballafaqohet me draftin e Ministrisë për të bërë specifikimet e duhura. Drafti është në marrëveshje bashkëpunimi dhe do vendosen piketa ku ne pretendojmë të arrijmë sa më shumë nga kërkesat tona”, tha Stroni.
Kërkesat
-Të shpallen dëshmorë të kombit të gjithë ata pjesëtarë të personelit shëndetësor të cilët humbin jetën në këtë luftë me këtë armik të padukshëm
-Të bëhet sigurimi i jetës së personelit shëndetësor, me qëllim që familjet e tyre të mund të vazhdojnë jetën edhe pas fatkeqësive të mundshme në këtë luftë.
-Rritje të vlerësueshme e trajtimit financiar të personelit shëndetësor.
-Personeli shëndetësor të çdo niveli t’i sigurohen të gjitha kushtet optimale në punë për parandalimin e infeksionit sipas të gjitha standardeve kombëtare dhe ndërkombëtare.
Sa pak paguhen mjekët
Në fund të muajit korrik revista “Monitor”, botoi një vështrim krahasues të pagave në vendet e rajonit tonë për vitin 2019. Paga mesatare në aktivitetin e “Shëndetësia dhe veprimtari të tjera sociale” në Shqipëri është 435 euro, është afërsisht sa gjysma e mesatares rajonale. Vitin e kaluar, edhe Kosova i rriti ndjeshëm pagat e mjekëve dhe infermierëve, me synim ndalimin e eksodit të bluzave të bardha.
Burimi: Institucionet statistikore përkatëse, përpunime të Monitor
Megjithatë, analiza e studime të shumta e rendisin shumë keq Shqipërinë në përfundimet e tyre, sa i përket trajtimit të bluzave të bardha. Instituti i Vienës për Studime Ekonomike Ndërkombëtare arriti në përfundimin se në Shqipëri, ata që kujdesen për shëndetin e njerëzve paguhen më pak se 20% e asaj që paguhen të njëjtat profesione në 15 vendet më të zhvilluara të Bashkimit Europian.
Asnjë vend tjetër i Europës apo Ballkanit Perëndimor nuk ka një normë kaq të ulët sa vendi ynë dhe askush nuk zbret nën 20%. Pra, në linja më të përgjithshme, me pagën që merr në Shqipëri, një mjek dhe infermier shqiptar mund të blejnë diçka më shumë se 15% të asaj që blejnë kolegët e tyre, në Finlandë, dhe diçka më pak se 10% të asaj që blejnë kolegët e tyre në Luksemburg. Duket se kjo është edhe një prej arsyeve kryesore të valës së largimit të këtyre profesionistëve nga vendi ynë dhe i gjithë rajoni gjatë viteve të fundit.
Bluzat e bardha ZERO shpërblim për punën e tyre gjatë pandemisë
Më 14 korrik vendimi i Francës për një rritje historike të pagave për bluzat e bardha do bëhej kryelajmi i medieve të mëdha ndërkombëtare. Sipas BBC, Franca miratoi rritjen e pagave me një vlerë prej 8 miliardë eurosh për punonjësit e shëndetësisë, ndërsa qeveria ka vlerësuar rolin e tyre në luftën kundër koronavirusit.
Ndërkohë në Shqipëri, bluzave të bardha iu premtua një shpërblim, por shumë mjekë dolën në protesta pasi nuk e morën atë me pretendimin se nuk ishin në vijën e parë të frontit. Nga ana tjetër, bluzat e bardha jo vetëm nuk kanë njohur rritje pagash, por janë vendosur në syrin e furtunës së koronavirusit. Nga QSUT në Tiranë dhe nëpër spitalet e poliklinikat e shumë rretheve, ata janë infektuar dhe në raste ekstreme edhe kanë humbur jetën.
Me anë të një statusi në Facebook, mjeku i mirënjohur Tritan Kalo ka kërkuar aso kohe që Shqipëria të bëjë të njëjtën gjë si Franca, duke shtuar se paga e tij nuk ishte rritur që prej vitit 2013. Po ashtu, Kalo shtonte se është i bindur se shumë mjekë e infermierë do ta rishohin si mundësi optimale largimin nga vendi, sikundër edhe ka ndodhur deri më tani. Ai bëri thirrje që qeveria të reagojë, pasi burimet njerëzore cilësore nuk janë të pashtershme më fushën e dhënies së përkujdesit mjekësor.
Qeveria vijon të lartësojë rëndësinë e veprave publike me një retorikë të bukur që do ta kishte zili edhe Aristoteli. Por, do ishte mirë që të ndiqte edhe parimin e nevojave dhe balancimit të tyre në shpërndarjen e të ardhurave, pasi interesat personale e kanë verbuar shikimin për rritjen e rrogave të bluzave të bardha (në rastin konkret) kur kemi më shumë nevojë për ta.
