Katër persona të kthyer nga Kina pak ditë më parë në Shqipëri përmes Aeroportit “Nënë Tereza” i janë nënshtruar një kontrolli pasi dyshonin se mund të ishin prekur nga koronavirusi.
“ABC News” njofton se ata kanë kërkuar ndihmën e mjekëve në Tiranë dhe testet e kryera në Institutin e Shëndetit Publik kanë dalë negative ndaj virusit kinez.
Dy persona kanë rezultuar me grip të thjeshtë, ndërsa dy të tjerët të shëndetshëm.
Ministria e Shëndetësisë deklaron se rreziku për depertimin e Koronavirusit në Shqipëri vazhdon të mbetet i ulët, por masat janë marrë.
Në çdo pikë kufitare është ngritur dhoma e posaçme për monitorimin e rasteve të dyshura.
Dje ministrja e Shëndetësisë, Ogerta Manastirliu tha se në Spitalin Infektiv në QSUT dhomat e izolimit janë pajisur me aparaturat respiratore të monitorimit dhe sistemin e gazrave mjeksorë.
Trajnimet e strukturave shëndetësore sipas ministrisë po vijojnë ndërkohë që është menduar dhe organizmi i karantinës në rast nevoje, raporton “ABCNews”.
/abcnews.al
