Ambasada ukrainase në Selinë e Shenjtë kanë deklaruar se, sipas inteligjencës, trupat rusë po përgatisin një sulm ajror në Katedrale, një nga vendet më të famshme në Kiev me një vlerë të jashtëzakonshme historike dhe kulturore.
Katedralja e Shën Sofisë në Kiev u shpall vend i Trashëgimisë Botërore në vitin 1990. Ajo është krenaria e qytetit me kupolat e saj të arta dhe të gjelbra dhe ndërtesat e manastirit. Katedralja është simbol i kryeqytetit mijëravjeçar ukrainas dhe unitetit të vendit.
Ndërtimi i saj nisi në vitin 1037, me dëshirën e Jaroslav të Urtit (1016-1054). I ati, Vladimir I Svyatoslaviç i Kievit, u konvertua në i krishterë në vitin 988, duke përqafuar ritin ortodoks dhe pati ndërtuar një kishë kushtuar Virgjëreshës (e cila u shemb dy shekuj më vonë).
Jaroslav ndërtoi një më të madhe, duke marrë emrin nga Shën Sofia e Kostandinopojës. E ngritur në kodrën më të lartë të qytetit, në kryqëzimin e katër rrugëve kryesore të hyrjes për në Kiev, kisha e re duhet të tërhiqte pelegrinët për madhështinë e saj.
Pjesa e brendshme frymëzohet nga kishat e vjetra ruse dhe ruan mozaikë të shekullit XI të stilit bizantin, të cilët mbulojnë një sipërfaqe totale prej 260 metrash katrorë.
Me madhështinë e saj, Shën Sofia ishte vendi i kurorëzimit të princave ukrainas. Pas kambanores së lartë katërkatëshe, ku dominon një kupolë e artë, shndrisin 12 kupolat më të vogla të ndërtuara në një stil që të sjell ndër mend shkëlqimin barok.
Burimi: Monitor
