Mbyllja e vend-grumbullimit të mbeturinave në Porto Romano, duket se ka krijuar një kaos të vërtetë në qytetin e Durrësit, tani që jemi edhe në sezonin turistik.
Për shkak të kostos së papërballueshme për t’i çuar mbeturinat në Sharrë, Bashkia Durrës vendosi t’i dërgonte ato në Manzë.
Sikur të mos mjaftonte gjendja e mjerueshme e shumë familjeve që u prekën nga tërmeti, tani Manza duhet të vuajë edhe pasojat e një katastrofe mjedisore me djegien e plehrave.
Kjo situatë ka çuar prej mbrëmjes së djeshme banorët atje në protestë, duke duke bllokuar kamionët me mbeturina pasi tymi toksik dhe era e keqe fare pranë banesave, u bë e padurueshme.
Aktualisht është ndërprerë dërgimi i mbeturinave në Manzë, pasi nuk ka më vend, ndërsa Drejtori i pastrimit të plazhit, Alfred Luli tha për Report TV se për disa ditë mbeturinat do të dërgohen në Sharrë.
Për të bërë këtë Bashkia e Durrësit pret një fond shtesë nga Ministria e Financave.
Ndërkohë, qyteti i Durrësit është shndërruar në një katastrofë të vërtetë me kazanët e tejmbushur. Gjatë natës, disa banorë u kanë vënë flakën atyre në shenjë proteste, duke krijuar ndotje gjithandej.
Ambientalisti Sazan Guri e quajti krim shëndetësor këtë ngjarje, me pasoja për një komunitet të tërë.
”Është krim i mirëfilltë jo mjedisor, krim shëndetësor. Ky vret një komunitet të tërë. Jo vetëm të komunitetit të Manzës por edhe të Shijakut, edhe të Shën Avlashit, edhe të Maminasit.”
Reagime ka pasur edhe nga Partia Demokratike, sipas së cilës dyshja Rama-Dako po helmojnë qytetarët e Durrësit dhe Manzës
Nga qeveria ose Ministria e Mjedisit, nuk ka ende asnjë përgjigje, ndërkohë që jemi në pritjeje të një zgjidhje urgjente për këtë katastrofë mjedisore.
