Kur përfundon një festival shpesh ka pakënaqësi mes artistëve dhe i pari që vendosi të ngrinte zërin është Kastro Zizo.
Ai konkurroi në “Kënga Magjike” me projektin“Sonata e gjumit” dhe ajo që e ka shqetësuar më shumë duket se ishte votimi.
Për këtë arsye në formë bojkoti, Kastro vendosi që të mos shfaqej në finalen e festivalit.
“Pasi pashë finalen jam shumë i lumtur që nuk isha pjesë e një farse, hipokrizie dhe pseudo-lumturie në sytë e disave. Unë i pari jam hipokriti më i madh, mjafton të shihni fletën time të votimit dhe 70% e atyre që kam dhënë pikë ose më ngjajnë mediokër ose s’i kam dëgjuar fare. Pse? Për të qenë dhe unë si gjithë të tjerët, pa fjalë dhe ‘probleme’, i rregullt me sistemin”, shkruan ndër të tjerash këngëtari.
Ai bën një kritikë për ngjashmërinë e këngëve, për zhveshjet apo për ato që ishin të kopjuara. Por “sulmin” kryesor në postimin tij Kastro Zizo e kishte me këngëtarët dhe veçanërisht ata të rinjtë.
“Më vjen të qaj, plas, vuaj, shpërthej, rënkoj, etj. kur pashë një grumbull ‘talentesh’ të rinj që vlerësonin me 0 pikë mua apo disa të tjerë, që kanë një jetë në skenë”, thuhet në postimin e tij.
Ai e mbyll postimin duke thënë se vitin tjetër do të zgjidhte më mirë të konkuronte një festival lokal në Bari.
Postimin e tij nuk do ta gjeni më në Instagram, pasi këngëtari vendosi ta fshinte vetëm pak orë pas publikimit.
Burimi: Instagram
