Shtatë ditë pasi filmi “Barbie” i regjisores Greta Gerwig dhe “Oppenheimer” i Christopher Nolan thyen rekorde, të dy vazhdojnë edhe në javën e dytë të jenë shumë të kërkuar në kinema.
“Barbie” fitoi 93 milionë dollarë (84.3 milionë euro) në fundjavën e dytë të publikimit, sipas vlerësimeve të bëra.
“Oppenheimer” qëndron në vendin e dytë me 46.2 milionë dollarë (41.8 milionë euro) fitime. Shitjet për të dy filmat ranë me 43 për qind dhe 44 për qind, respektivisht – shumë pak nga rëniet e zakonshme të javës së dytë.
“Barbenheimer” ka dëshmuar se nuk është një fenomen i një fundjave, por një bonancë e vazhdueshme në arkën e fitimeve. Të dy filmat së bashku tashmë kanë tejkaluar një miliard dollarë (906 milionë euro) në shitjet e biletave në mbarë botën.
