Pasagjerët në disa nga aeroportet më të mëdha të Europës vijojnë të përballen me vështirësi serioze këtë të diel, pas një sulmi kibernetik që preku sistemin e regjistrimit të fluturimeve të shtunën, duke shkaktuar paralizë të operacioneve në disa terminale.
Aeroporti i Brukselit ka njoftuar se gjysma e fluturimeve të planifikuara për t’u nisur sot do të anulohen, për shkak të ndërprerjes së vazhdueshme të sistemit të regjistrimit elektronik.
“U kemi kërkuar linjave ajrore të anulojnë 50% të fluturimeve të së dielës, më 21 shtator, për të shmangur radhët e gjata dhe anulimet e vonshme,” deklaroi një zëdhënës i aeroportit.
Eurocontrol, agjencia evropiane e menaxhimit të trafikut ajror, u ka kërkuar gjithashtu linjave ajrore të reduktojnë gjysmën e orarit të fluturimeve për në dhe nga Brukseli deri të hënën.
Sulmi prek edhe Heathrow-n dhe Berlinin
Aeroporti Heathrow në Londër gjithashtu është prekur nga sulmi, me disa fluturime të vonuara për shkak të një “problemi teknik” që ndikon sistemet e regjistrimit të disa linjave ajrore. Ndërkohë, pritje të gjata dhe vonesa janë raportuar edhe në Aeroportin Brandenburg të Berlinit.
Kompania RTX, pronare e Collins Aerospace – e cila operon sistemin Muse, softuerin e prekur – konfirmoi se bëhej fjalë për një “ndërprerje të lidhur me një sulm kibernetik” që preku “aeroporte specifike”.
Muse është një sistem i përbashkët i përdorur nga linja të ndryshme ajrore për regjistrimin e pasagjerëve dhe dorëzimin e bagazheve në sportele të përbashkëta.
Në Heathrow, British Airways ka kaluar në një sistem rezervë dhe po operon normalisht, por shumica e linjave të tjera ajrore janë prekur rëndë. Administrata e aeroportit paralajmëroi për vonesa të mëtejshme, ndërsa përpjekjet për rivendosjen e plotë të sistemit janë ende në vijim.
Komisioni Evropian tha se po “monitoron nga afër” situatën, duke shtuar se nuk ka indikacione që sugjerojnë një përhapje të gjerë apo një kërcënim më serioz.
Sipas platformës FlightAware, qindra fluturime u vonuan të shtunën në të gjithë Evropën. Në Irlandë, aeroportet e Dublinit dhe Korkut raportuan “ndikim të vogël”, me disa linja ajrore që kaluan në regjistrim manual.
EasyJet dhe Ryanair, të cilat nuk përdorin sistemet e prekura në Heathrow, thanë se po operojnë normalisht.
