Vonesat e fluturimeve nga Tirana drejt Italisë kanë irrituar pasagjerët në aeroportin “Nënë Tereza”. “Top Channel” raporton se ditën e dielë, fluturimi nga Tirana drejt Bergamos është vonuar 14 orë, ndërsa ai drejt Malpensës (Milano) rreth pesë orë. Këto fluturime operoheshin nga kompania ajrore “Blue Panorama”, që ndodhet në Shqipëri prej gjashtë vitesh. Përfaqësuesja e e kompanisë “Blue Panorama”, Daniela Xhixha, pranon se ka pasur vonesa me fluturimet e së dielës.
“Vonesa ka pasur. Është bërë e pamundura që pasagjerët të informohen në kohë rekord nga kompania, pranë zyrave të biletarisë në aeroportin e Tiranës”, tha Xhixha.
Sipas saj, ka një rregullore europiane që mbron të drejtat e pasagjerëve pasi vonesat ndodhin në gjithë botën.
“Pasagjeri zgjedh totalisht t’i rimbursohet bileta e tij. Në momentin që rimbursohet bileta, pasagjeri mund të fluturojë një ditë tjetër, por duke marrë mbrapsht të gjitha paratë që ka paguar për atë fluturim të asaj dite. Nëse pasagjeri zgjedh të fluturojë një ditë tjetër duke përdorur po atë biletë, kjo ofrohet falas nga kompania. Nëse pasagjeri zgjedh në mënyrë të drejtpërdrejtë të fluturojë po atë ditë, atëherë kompania merr përsipër akomodimin në hotel të pasagjerit”, u shpreh më tej Xhixha.
Përfaqësuesja e kompanisë mbikëqyrëse jep një këshillë për pasagjerët.
“Është shumë e rëndësishme që pasagjeri, të paktën një ditë përpara të informohet mbi statusin e biletës së tij, e të informohet gjithashtu edhe mbi statusin e fluturimit”, tha Xhixha.
Burimi: Top Channel
