Vrasja e Albert Kransiqit nga babai i tij, Skënder Krasniqi, tronditi gjithë Kosovën mbrëmjen e djeshme. Albert Krasniqi nuk ka qenë emër i panjohur për publikun, pasi ai ka pasur miqësi me shumë personazhe VIP. Madje në vitin 2016-të i ndjeri plagosi në mes të Prishtinës reperin Noizy. Gjithçka ndodhi më datë 13 shtator 2016, ndërsa dy vite më vonë dyshja edhe pse ishin pajtuar, gjykata i dënoi.
Shumë personazhe të famshëm reaguan pas ngjarjes tragjike, duke u shprehur të tronditur. Ndërkohë ditën e sotme kanë reaguar edhe Ledri Vula e Cozman, që kanë qenë pjesë e labelit “BabaStars” njësoj si Krasniqi.
Të tre ata kanë qenë pjesë e grupit dhe janë larguar prej tij për shkak të pakënaqësive në periudha të ndryshme. Si fillim ishte Cozman ai i cili ndau në Instagram një foto me Albert Krasniqin, duke shprehur gjithë trishtimin për ndarjen nga jeta të mikut të tij të vjetër.
“U prehsh në paqe vëllai im! Fjalët nuk mundet ta përshkruajnë atë që ndjej tani “, ka shkruar Cozman.
Edhe Ledri ka publikuar një foto me të ndjerin dhe përkrah saj ka shkruar: “I lehtë të qoftë dheu Brada”.
Albert Krasniqi do të përcillet ditën e sotme në orën 15:00 për në banesën e fundit. Biznesmeni i njohur u vra ditën e djeshme nga babai i tij në Prishtinë dhe mediat vendase raportojnë se ngjarja e rëndë ka ndodhur pas konflikteve të vazhdueshme familjare. Ndërkohë mësohet se vetë babi i Albert Krasniqit e njoftoi policinë pasi zbrazi karikatorin mbi djalin e tij duke i marrë jetën këtij të fundit. Sakaq, mediat në Kosovë, kanë raportuar para pak ditësh se Albert Krasniqi i kishte dhënë fund edhe martesës me ish-missin e Kosovës Besa Gashi, me të cilën ka edhe një vajzë.
