Jemi mësuar çdo vit të presim paraqitje mbresëlënëse në tapetin e kuq të famshëm botëror të Festivalit të Filmit në Kanë . Megjithatë, këtë vit, ka disa pamje që definitivisht nuk do t’i shohim, pasi festivali francez ka vendosur një kod të ri të rreptë veshjeje që u publikua së fundmi në faqen e tij të internetit. Edhe personazhet më të famshëm duhet ta zbatojnë atë dhe mund të ndalohen nga tapeti i kuq nëse e shkelin atë.
Çdo pamje ose veshje tepër e përpunuar që ndjek trendin popullor të fustaneve ” lakuriq” nuk lejohet, pasi organizatorët i japin përparësi “mirësjelljes” dhe lëvizjes sa më efikase të mysafirëve nëpër ambientet e festivalit. Sipas faqes zyrtare të Festivalit të Filmit në Kanë, kodi i veshjes për shfaqjet gala në Grand Théâtre Lumière, ku marrin pjesë ekipet artistike të filmave, kërkon veshje zyrtare – domethënë, një fustan të gjatë ose një smoking.
Nga ana tjetër, sipas organizatorëve, mysafirëve u lejohet të veshin:
-një fustan të vogël të zi,
-fustan kokteji,
-kostum me pantallona të errëta ose
-bluzë elegante me pantallona të zeza
Sa i përket këpucëve , mysafirët mund të veshin “këpucë dhe sandale elegante me ose pa taka”, por atletet janë rreptësisht të ndaluara. Ata që veshin kostum duhet të veshin një kostum të zi ose blu të errët, të shoqëruar me një papion ose kravatë të errët.
