Kur dhimbja kthehet në forcë dhe më pas një histori frymëzimi. Kjo shprehje i përshtatet më shumë se kurrë Megi Alimuçaj.
Ajo ishte vetëm 22 vjeç kur ajo u diagnostikua me kancer gjiri, një sëmundje shumë e pazakontë në moshën e saj, por ajo ka ditur si ta kalojë.
Megi Alimuçaj, e cila ka rrëfëyer historinë e saj emocionuese sot në studion e “Abc-ja e mëngjesit”, u shpreh se zbuloi që kishte kancer gjiri 3 ditë para se të festonte 22 vjetorin e lindjes.
“3 ditë para se të mbushja 22 vjeçe u diagnostikova me kancer gjiri. I gjithë viti shkoi duke luftuar me këtë sëmundje. E kam dalluar rastësisht në dush duke prekur veten. Ishte një farë mase e cila nuk më jepte asnjë dhimbje gjatë ditës. Për 6 muaj e kam mbajtur nën kontroll. Askush nuk e mendonte se mund të ishte kancer. Por rezultoi e tillë. Sa më shumë kalonte koha aq më shumë bëhej e dallueshme. Të gjithë kurimin tim e kam ndjekur në Selanik. Unë kam qenë shumë e fortë që në fillim. I kam thënë vetes para pasqyrës që kanceri ka gjetur njeriun gabuar, unë do e mund”, shprehet ajo.
Megi ka treguar edhe momentet e para kur filluan ti bien flokët pas fillimit të kimio-terapisë.
“Kurimi ka ato të vetat, bien flokët, vetullat. Por mua më ka pëlqyer edhe vetja pa flokë. Tani që kam kaluar këtë sëmundje dua të ndihmoj njerëz të tjerë. Përpara se të nisja kimion mjeku më informoi për të gjitha pasojat, dhe mes tyre më renditi edhe rënien e flokëve. Më ka thënë vetëm një fjalë: ti ke sytë më të bukur në botë dhe çfarë do të ndodhë ti do jesh shumë e bukur. Pas kimios së dytë flokët filluan të më binin, e kuptova se më ranë shumë dhe ka qenë babi im që më mi preu vetë”, tha ajo.
Sot ajo është 24 vjeç dhe e lumtur që e ka mposhtur këtë sëmundje, e cila më shumë i ka dhënë forcë sesa e ka demoralizuar.
Historia e dhimbshme që ajo përjetoi, i është shndërruar tashmë në një mësim shumë të vlefshëm dhe për më tepër dëshiron që të frymëzojë të gjitha gratë që preken nga kanceri i gjirit.
Për këtë arsye, Megi ka hapur edhe faqen e saj motivuese “RrezeCS.com” për të ndihmuar gratë që preken.
