Albin Kurti nuk do të shkojë sot në zyrën e tij në Kryeministri, pasi është vetëizoluar në banesën e tij.
Kryeministri në detyrë i Kosovës, ka bërë me dije se ka pasur kontakt me dikë që ka takuar një të infektuar me COVID-19, ndaj deri në daljen e rezultateve të testit, nuk do të dalë në punë.
Kurti shprehet se puna e tij do të vijojë nga zyra, me po të njëjtin përkushtim.
“Të dashur qytetarë,
Sot është dita e parë kur nuk do të dal në punë në Kryeministri (ZKM). Një zyrtar i Ministrisë së Integrimeve Evropiane (MIE) ka pasur kontakt të ngushtë me një nga personat e dalur pozitiv në testin për COVID-19. Janë marrë mostrat dhe po presim rezultatin.
Unë kam pasur kontakt me të, sikurse edhe punonjës të tjerë në MIE e ZKM, ndonëse gjithnjë duke respektuar rregullat për distancën fizike. Nga sot jam në vetizolim në banesë gjersa të dalin rezultatet e testimit për zyrtarin nga MIE.
Do t’i kryejmë detyrat nga largësia me përkushtimin e njëjtë, do t’i marrim vendimet e duhura me përgjegjësinë e njëjtë.
Ju falemnderit.”, shkruan Kurti.
