Reperi i njohur kosovar, Seven Saraqi mbrëmjen e kaluar ka hedhur në treg këngën e tij më të fundit, e cila ka zgjuar kuriozitetin e të gjithëve.
Ndryshe nga herët e tjera Seveni ka vendosur të vijë pranë publikut me një këngë që tregon kalvarin e gjatë të vuajtjeve të njerëzve në Kosovë.
Projekti mban titullin ‘Nothing Changed’ dhe vëmendjen kryesore ai e ka përqendruar tek lufta e Kosovës.
Seven ka bërë pjesë të klipit disa sekuenca mjaft prekëse që e pasqyrojnë më së miri atë periudhë të errët.
“Unë kam lindur në Kosovë dhe jam rritur në New York. Në 1996-ën familja ime u detyrua që të largohej nga shtëpia si pasojë e politikave që po shkatërronin shtetin. Kam parë shtëpinë e fëmijërisë reksa shkrumbohej. Kemi humbur gjithçka, miqtë, komshinjtë dhe familjen. Erdhëm në Amerikë pa asgjë tjetër përveç disa rrobave të futura në një çantë shpine dhe disa gjërave të tjera që arritëm t’i shpëtonim nga shtëpia. Fakti që u rrita në New York ka qenë një bekim. Në një qytet kaq ndryshe, me kaq shumë kultura, nuk mund të mos përfshihesha me rrymën. Unë kam lindur shqiptar, por New York-u më ka bërë njeriun që jam sot. Dua të falënderoj të gjithë fansat që kanë qenë me mua në këtë rrugëtim muzikor, prindërit e mi, historia muzikore e pasur e të cilëve ka rrethuar gjithë jetën time dhe më ka lejuar të kem zërin tim. Faleminderit. Çdo gjë që bëj e bëj për ju dhe uroj që një ditë t’jua shpërblej për çdo mundësi që më keni dhënë. Ndërsa për vendlindjen time, do ju tregoj të gjithëve, çfarë mund të bëjë një i ri refugjat nga Kosova në këtë vorbull të madhe jete. Faleminderit të gjithëve ju që më keni shoqëruar në këtë udhëtim”,-shkruan Seven Saraqi.
Kënga ka marrë komente mjaft pozitive nga fansat e këngëtarit, të cilët e përgëzojnë për këtë projekt dhe shohin si një mundësi shumë të mirë që ai të ecë para në tregun botëror.
