Masakra e Selenicës së Vlorës ku mbetën të vrarë 8 persona tronditi mbarë opinion shqiptar. Ritvan Zykaj qëlloi me armë mbi kushërinjtë duke i lënë ata të vdekur në vend.
Tashmë Ritvani ndodhet në paraburgim, teksa po pritet që të jepet nga gjykata edhe vendimi përfundimtar për të.
Mirëpo ndërkohë që mediat shqiptare, madje dhe ato të huaja folën pafund për vrasësin Zykaj, në hije qëndruan viktimat. Kush ishin ata dhe kë kanë lënë pas?
Gazetarja Anila Hoxha ka shkuar të pijë kafen e mortit në shtëpinë e tetë të vrarëve, ku ndodhen 3 fëmijët e tyre.
“Kam vendosur të pi kafen e mortit në familjen Zykaj. Dhe nuk diskutohet më tej. Tragjedia më është rrotulluar gjatë në mendje. Dua ‘të njoh’ 8 të vrarët. Dua tu shtrëngoj dorën të gjallëve të mbetur. Paçka se e vështirë. Shumë e vështirë ti japësh dorën Albit , vetëm 18 vjeç, të cilit ju vra nënë e babë, motër e vëlla, gjyshërit, xhaxhallarët. E vështirë të rrok dorën me Arielin dhe të vëllain Falkua përkatësisht 20 e 24 , që shpëtuan falë fatit sepse njëri ndodhej në Greqi dhe tjetri në punë në një pikë karburanti. Por nisem…”, fillon rrëfimi i Anilës.
Sapo mbërrin në shtëpinë e tyre Anila përballet me detajet që kanë lënë pas anëtarët e kësaj familje, të cilat askush nuk merr guximin t’i prekë.
“Në gjurmët e gjakut tre fëmijët e ngelur, të vetmit të mbetur vendosin lule. Më japin cigare dhe u jap cigare. Fëmijë të rritur nga një fatkeqësi e papërshkruar. Albi nuk ka më askënd nga familja. Sarën e vranë. Ëndërronte të bëhej mjeke. Mësonte anglisht. E çonin prindërit çdo ditë në Selenicë. Ledionin 8 vjeç, të vëllanë, ja vranë. Çantat e tyre të shkollës kanë mbetur në dhomën e gjumit. Rrobat e të ëmës,Vasilikës janë mbi divan. I ati ka një kapele vere në portmondo. Albi ka mbetur vetëm. Ai tashmë nuk e di më çdo të thotë të jetosh, çdo të thotë e ardhme. I ka shitur të gjitha, pulat, lopët, viçat dhe sytë i ka larg, sa me larg këtij vendi që s’të jep shpresë. Por nuk e di si. Xhaxhai i tij Resmiu thotë se shteti i braktisi, kanë mbetur 3 djem, për të cilët askush”, tregon Anila.
Në shtëpi ndodhet edhe djali i tyre, Falkua, i cili kishte biseduar për herë të fundit me Ritvanin, para se të bënte aktin e rëndë.
“Edhe Falkua dhe i vëllai, humbën nënën e babën. Afërdita dhe Azemi. Vdiqën sikur të ishin viktima të një lufte sepse kur ka rend dhe siguri, asnjë vrasës nuk bredh me armë në krah e gjuan si ti teket, shumë kohë në ajër dhe pastaj ndaj kushërinjve. Me shkroi atë ditë tregon Falkua. Ritvani më shkroi. Isha në punë. Më tha ku je? Më sill një paketë. Ishte mbase ora 11. Më pas ndodhi ajo që ndodhi. Shumë gjëra nuk i mbaj mend. Dua dikush të vij e të ma thotë çfarë ka ndodhur në të vërtetë, ai i shfarosi të gjithë, të 8 njerëzit tanë me pleq me fëmijë, nuk e di cila është e vërteta. Arieli i mban dorën vëllait të madh dhe kushëririt Albit”, tregon Anila.
Në momentin që ndodhi tragjedia në shtëpi ishte dhe Krenari, i cili është me aftësi të kufizuara dhe ishte në gjumë ndërsa Ritvani vrau familjarët e tij.
“Krenari është i vetmi që nuk flet. E shpëtoi sëmundja nga vdekja. Është shurdhmemec. Teksa Ritvan Zykaj po vriste kushërinjtë e tij, 55-vjeçari bënte gjumin që po i shpëtonte jetën. Por ai është një fatkeq si të tjerët. Është një njeri pa shtet. Shteti i tij dhe imi, dy vjet më parë i hoqi ndihmën ekonomike, megjithëse ai është sëmurë dhe e mbanin gjallë vëllezërit që ju vranë dhe një dhi e bardhë. Krenari hesht, por e ndjen dhimbjen njësoj a ndoshta me tepër. Të shpëtuarit shohin njëri-tjetrin, rrallë kam parë një nevojë aq të lexueshme për njëri-tjetrin sa në shtëpinë e tyre. Pak metra me tej, me portë të mbyllur është shtëpia e Ritvan Zykajt. Aty jetojnë gjyshërit. Prindërit janë larguar përgjithmonë., përfundon Anila.
