Me rastin e 89-vjetorit të shkrimtarit të madh, Dritëro Agolli, është zbuluar murali i madh në qendër të Tiranës që bën bashkë tre kolosë të artit shqiptar. Përveç Agollit, në të është përfshirë Ismail Kadare dhe kompozitori Feim Ibrahimi, që kanë dhënë një kontribut tepër të çmuar në vendin tonë.
Murali në formë biblioteke ngjalli polemika, për shkak se Agolli dhe Kadare shfaqen në një portret, ndërsa Ibrahimi është kujtuar vetëm përmes një partiture muzikore dhe një firme. E bija e tij Etrita Ibrahimi reagoi përmes një letre të gjatë për minimizimin e figurës së kompozitorit, por nga ana tjetër u shpreh e lumtur që figura e tij mungon në mural, sepse ngjan me një vepër të realizimit socialist.
https://www.facebook.com/etrita.ibrahimi/posts/10214418306610616
Menjëherë pas debatit që u hap ka reaguar edhe artisti i rrugës, Franko Dine, i cili realizoi muralin në qendër të Tiranës.
“Jemi munduar të bëjmë më të mirën, firma është shumë më e rëndësishme se vetë portreti. Nuk kemi dashur të bëjmë asnjë ndarje për të cilën e bija ka treguar. Po ashtu jam munduar ta sjell në kohë, të jem me kohën bashkë me artistët e tjerë që bëjnë murale në botë. Është e drejtë e çdo njeriu ta perceptojë si të dojë. Janë të pranueshme sepse arti është në dorë”, tha Dine për “Abc News”.
Në mural renditen edhe disa vepra të klasikëve botërorë, të cilët qëndrojnë në krye, më pas vijnë Agolli me Kadarenë, një libër nga Maks Velo dhe partitura e Feim Ibrahimit. Është mësuar se pas muzeut “Studio Kadare”, edhe familjarët e Dritëro Agollit kanë pranuar që shtëpia e shkrimtarit të merret nga Bashkia Tiranë dhe të kthehet në muze.
