Prej dy vitesh, gazetarja e mirënjohur Aida Shtino është angazhuar në Partinë Republikane në pozicionin e Sekretares së Marrëdhënieve me Publikun.
Mirëpo, të gjithë e mbajmë mend Shtinon si gazetare e emisionit të famshëm “Njerëz të humbur”, i cili u mbyll në mënyrë të çuditshme në vitin 2014.
Më herët, gazetarja ka pranuar se kanë kërcënuar personalisht, duke e detyruar që të mbyllë emisionin. (Lexo këtu)
Në një intervistë për “Gazeta Shqiptare”, Aida Shtino ka kujtuar me mall kohën e suksesshme të emisionit të saj dhe gjetjen e njerëzve të humbur, duke bërë të lumtur familjet shqiptare.
Gazetarja ka rrëfyer se dita e mbylljes së emisionit dhe prishja e studios ishte dita më e mërzitur e gjithë punës së saj.
“Fatkeqësisht ma mbyllën. Dhe ajo ka qenë dita ime më e mërzitur gjatë gjithë kohës të punës sime. Jam përpjekur shumë ta mbaja me mish e me shpirt, madje disa muaj e kam paguar vetë nga financat e mia personale stafin tim, sepse doja që ajo punë të vazhdonte dhe për këtë nuk jam penduar. Atë ditë kur kam parë të më prishin studion dhe kur erdhi urdhri se duhej të lija zyrat, kam marrë makinën dhe kam shkuar diku vetëm dhe ka qenë një nga ato momente, ku jam ligështuar dhe mendoja se ku gabova? Pse? Si mundet të mbyllet gjithë ajo punë? Gjithë ato struktura të ngritura në të gjithë botën në kërkim të atyre që mungonin, në kërkim të fëmijëve të zhdukur. Të gjitha i shkatërruan. Në fakt janë shumë “pse” që unë edhe sot nuk u jap dot përgjigje. Për mua, ai nuk ishte vetëm një emision televiziv, por ishte një mision ku ne, një grup gazetaresh po bënim diçka që nuk po e bënte as policia. Ju jeni dëshmitarë vetë të rasteve që ne kemi gjetur.”- u shpreh Shtino.
E pyetur nëse i ka ngelur ndonjë histori në mendje, gazetarja tregoi:
“Ka shumë histori. Por sigurisht do të veçoja historitë e fëmijëve të zhdukur. Sa shumë kemi kërkuar dhe atë periudhë pak nga pak po zbulonim atë pazëll që shoqëronte humbjet e tyre. Kur dëgjoj të flitet për historinë e Bleonës apo fëmijëve të tjerë, më vjen keq që nuk bëhen kërkime në thellësi, por thjesht publikohen sa për të bërë lajm. Historia e Bleonës ka dëshmitarë dhe ata dinë gjithë të vërtetën se çfarë ndodhi me vajzën. Këtu nuk e kuptoj pse nuk vepron policia e prokuroria.”
Shtino shtoi se mbyllja e emisionit e bëri të kuptonte se duhej një impenjim në rang shtetëror, ndaj iu fut politikës.
“Ishte një moment kur unë mendova e nisur nga emisioni, se me gjithë ato raste të humburish, do të duhej një impenjim më i madh në rang shtetëror. Kjo qe arsyeja pse u futa në politikë. Për të qenë një zë i atyre njerëzve që vinin tek unë dhe kërkonin ndihmë e që për vite të tëra nuk ishte bërë asgjë.”- tregoi gazetarja.
