Pak orë pas vrasjes së 26-vjeçarit Jurgen Kurti në derën e shtëpisë së tij, Instagrami i tij është dyndur me komente nga të afërm dhe persona që e njihnin vetëm virtualisht.
I riu i njohur nga të gjithë si menaxher i personazheve të njohur të artit, u ekzekutua mbrëmjen e së hënës në hyrjen e pallatit të tij në rrugën “Zef Jubani” pranë stadiumit “Selman Stermasi” në Tiranë, ku jetonte me nënën dhe motrën.
Si një personazh i njohur, ai kishte një profil të hapur në Instagram dhe shpesh publikonte foto nga udhëtimet dhe shtetet që vizitonte nga Hawaii në Los Angeles.
Jeta luksoze që bënte dhe e ekspozonte në rrjetet sociale është vënë nën shënjestër nga komentues të ndryshëm që nuk kanë lënë gjë pa thënë.
Kryesisht persona me adresa false komentojnë dhe kujtojnë edhe dy krimet për të cilat u shpall i pafajshëm Jurgeni. Kurti ka qenë akuzuar për vrasjen e të atit dhe dhunimin me pasojë vdekjen e një tregtari në Durrës së bashku me dy persona të tjerë.
Në rastin e parë autorësinë e vrasjes së babait të tij, Artur Kurti e mori daja Leonard Ristani, ndërsa në rastin e dytë në vrasjen e Agim Arapit në Durrës u dënua vëllai i vjehrrit, pavarësisht se u arrestuan të tre.
“Dhunoi për vdekje në mënyrë barbare një të moshuar 60 vjeç . Shpallet i pafajshëm pasi blen drejtësinë edhe tall me pafytyrësi bashkëshorten e të moshuarit duke i thënë “ta vrava burrin“ . Drejtësia u vu në vend. Nuk je askush t’i marrësh jetën dikujt edhe nëse ja merr, meriton të ta marrin jetën ty “, shkruan një komentues.
Komentues të ndryshëm e quajnë vrasjen e tij si një shenjë hakmarrjeje për krimet e bëra për të cilat i shpëtoi paq drejtësisë:
“Po ky që vriste burra në moshë, pse nuk funksionoi drejtësia për këtë? As ky s’ka të drejtë të vrasë i bie… kur vjen puna te gjaku s’ka njeri që ta fal. Ne jemi askushi për të gjykuar thjesht nxjerrim konkluzione nga kjo gjë, por të mendosh që vrau atë që e solli në jetë (babain) dhe më pas një burrë të pafajshëm në Durrës…..”
